নলবাৰীত আন্তৰ্জাতিক নাৰী দিৱস পালন

নলবাৰীৰ পৰা হেমন্ত কলিতা

আজি কৃষি বিজ্ঞান কেন্দ্ৰ, নলবাৰীৰ উদ্যোগত চেংনৈ গাঁৱত আন্তৰ্জাতিক নাৰী দিৱস পালন কৰা হয়। প্ৰায় ৬০গৰাকী পুৰুষ-মহিলাৰ উপস্থিতিত কৃষি বিজ্ঞান কেন্দ্ৰ, নলবাৰীৰ মুৰব্বী ডঃ মৃদুল ডেকাই আন্তৰ্জাতিক নাৰী দিৱসৰ তাৎপৰ্য ব্যাখ্যা কৰি নাৰীসকলক সমাজৰ প্ৰতিটো স্তৰতে নিজৰ অধিকাৰ সাব্যস্ত কৰি আগবাঢ়ি যাবলৈ পৰামৰ্শ আগবঢ়ায়। তেখেতৰ ভাষণত নাৰী সবলীকৰণ আৰু আত্মনিৰ্ভৰশীলতাৰ ওপৰত গুৰুত্ব আৰোপ কৰে। তেখেতে নাৰীসকলৰ বিভিন্ন স্বনিয়োজনৰ পথৰ বিষয়ে আলোচনা কৰে। উক্ত সভাত কৃষি বিজ্ঞান কেন্দ্ৰ নলবাৰীৰ সামূহিক বিজ্ঞান বিভাগৰ বিষয়বস্তু বিশেষজ্ঞ নাচিমা ফাৰহানা আলী, মীন বিভাগৰ বিষয়বস্তু বিশেষজ্ঞ অংকুৰ ৰাজবংশী আৰু পাম পৰিচালক প্ৰণৱ কুমাৰ দাসেও ভাষণ আগবঢ়ায়।

আনহাতে, আন্তৰ্জাতিক নাৰী দিৱসৰ লগত সংগতি ৰাখি কৃষি বিজ্ঞান কেন্দ্ৰ নলবাৰী আৰু অসম কৃষি বিশ্ববিদ্যালয় যোৰহাটৰ গ্ৰাম্য কৃষি কৰ্মঅভিজ্ঞতা আঁচনিৰ অন্তৰ্গত ছাত্ৰ-ছাত্ৰীসকলৰ উদ্যোগত নলবাৰীস্থিত শান্তি নিবাস অনাথ আশ্ৰমৰ আবাসীৰ মাজত ফলমূল, মিঠাই আদি বিতৰণ কৰে। উক্ত কাৰ্যসূচীৰ আঁতধৰে কৃষি বিজ্ঞান কেন্দ্ৰৰ উদ্যানশস্য বিভাগৰ বিষয়বস্তু বিশেষজ্ঞ হোমেশ্বৰ মজুমদাৰে।