২২ বছৰীয়া ৰাজনৈতিক জীৱনৰ সমাপ্তি : কেন্দ্ৰীয় মন্ত্ৰী অনন্ত কুমাৰৰ দেহাৱসান

আৰ এছ এছৰ এক আদৰ্শ ব্যক্তি, এগৰাকী সুদক্ষ সাংগঠনিক, বাংগালুৰুৰ 'সৰ্বজনপ্ৰিয়' আৰু ৰাষ্ট্ৰ সংঘত কানাড়া ভাষাত বক্তৃতা প্ৰদান কৰা প্ৰথমগৰাকী ব্যক্তি, কেন্দ্ৰীয় সংসদীয় পৰিক্ৰমা দপ্তৰৰ মন্ত্ৰী অনন্ত কুমাৰৰ আজি দেহাৱসান ঘটে ৷

উল্লেখ্য যে বহুদিন ধৰি হাওঁফাওঁৰ কৰ্কট ৰোগত আক্ৰান্ত হৈ থকা কেন্দ্ৰীয় মন্ত্ৰীগৰাকীয়ে আজি পুৱতিনিশা এক ব্যক্তিগত চিকিৎসালয়ত শেষ নিশ্বাস ত্যাগ কৰে ৷ মৃত্যুৰ সময়ত তেওঁৰ বয়স আছিল ৫৯ বছৰ ৷

অনন্ত কুমাৰে ক্ৰমাগতভাৱে ষষ্ঠবাৰৰ বাবে লোকসভালৈ নিৰ্বাচিত হৈ সবল ৰাজনৈতিক নেতৃত্ব আৰু বিচক্ষণতাৰ পৰিচয় দাঙি ধৰি থৈ যায় ৷ ১৯৫৯ চনৰ ২২ জুলাইত জন্মগ্ৰহণ কৰা কলা আৰু আইনৰ স্নাতক অনন্ত কুমা ৰেনিজৰ সামাজিক জীৱন আৰম্ভ কৰিছিল আৰ এছ এছৰ ছাত্ৰ সংগঠন অখিল ভাৰতীয় বিদ্যাৰ্থী পৰিষদৰ জৰিয়তে  ৷

তেওঁ এই সংগঠনটোৰ বিভিন্ন পদবীত কাৰ্যনিৰ্বাহ কৰি ৰাজ্যিক সম্পাদকৰ পৰা ৰাষ্ট্ৰীয় সম্পাদকৰ শাৰীত অৱতীৰ্ণ হৈছিল ৷ ইয়াৰ পিছত ১৯৮৭ চনত ভাৰতীয় জনতা পাৰ্টীত যোগদান কৰা অনন্ত কুমাৰে ৰাজ্যিক যুৱ মঞ্চৰ সম্পাদক, সভাপতিৰ পৰা ৰাষ্ট্ৰীয় যুৱ মৰ্চাৰ সাধাৰণ সম্পাদক আৰু সভাপতিৰ আসনো অলংকৃত কৰি গৈছে ৷

অনন্ত কুমাৰৰ জনপ্ৰতিনিধি হিচাপে অভিষেক ঘটে ১৯৯৬ চনত ৷  সেই বছৰ তেওঁ দক্ষিণ বাংগালুৰু সমষ্টিৰ পৰা লোকসভাৰ সাংসদ হিচাপে প্ৰথম নিৰ্বাচিত হয় আৰু তেতিয়াৰ পৰা বৰ্তমানলৈকে অপ্ৰতিদ্বন্দ্বী হিচাপে লোকলভালৈ নিৰ্বাচিত হৈ আহিছে ৷

তেখেতৰ মৃত্যুত ৰাষ্ট্ৰপতি, উপ-ৰাষ্ট্ৰপতি, প্ৰধান মন্ত্ৰী, বিজেপিৰ সভাপতি, আৰ এছ এছৰ সভাপতিকে ধৰি কংগ্ৰেছৰ সভাপতি তথা আন ৰাজনৈতিক দলৰ নেতাসকলে শোক প্ৰকাশ কৰে ৷