ক'লা পতাকা  হায় হায় ধ্বনিৰে উত্তাল নগাঁৱৰ ৰাজপথ

আজি নগাঁও জিলা বিজেপিৰ যুৱ মৰ্চাই ক'লা পতাকা প্ৰদৰ্শন কাৰী সকলৰ বিৰুদ্ধে ক্ষোভ উজাৰি এক উত্তাল পৰিবেশৰ সৃষ্টি কৰে। উল্লেখ্য যে কালি নগাঁৱৰ নেহৰুবালিত অনুষ্ঠিত মহাবীৰ লাছিদ চিলাৰায় সেতু নিৰ্মাণৰ কেন্দ্ৰীয় অনুষ্ঠানত  অংশগ্ৰহণ কৰিবলৈ অহা ৰাজ্যৰ গড়কাপ্তানি আৰু বিত্ত আদি বিভাগৰ মন্ত্ৰী ডঃ হিমন্ত বিশ্ব শৰ্মাক চহৰ খনৰ মৰিগাঁও বাছ ছেণ্ডিকটৰ ওচৰত অসম জাতীয়তাবাদী যুৱ-ছাত্ৰ পৰিষদৰ কেইজনমান সদস্যই ক'লা পতাকা পদৰ্শন কৰি নাগৰিকত্ব সংশোধনী বিধেয়কৰ বিৰুদ্ধে প্ৰতিবাদ সাব্যস্ত কৰিছিল। ইয়াৰ প্ৰতিবাদতেই আজি নগাঁও জিলা বিজেপি যুৱ মৰ্চাই বগা পতাকা উৰুৱাই ক'লা পতাকা উৰুওৱা দুষ্কৃতিকাৰীসকলৰ বিৰুদ্ধে সৰৱ হৈ পৰে।

মৰ্চাৰ সদস্য আৰু সমৰ্থকসকলে ক'লা পতাকা উৰুওৱা স্থানতে পানী ছটিয়াই শুদ্ধিকৰণ কৰি বগা পতাকা উৰুৱাই উত্তাল প্ৰতিবাদ সাবস্ত্য কৰে। বিজেপিৰ নগাঁও জিলা সমিতিৰ কৰ্মকৰ্তাসকলৰ সহযোগত যুৱ মৰ্চাৰ প্ৰতিবাদকাৰী সদস্যসকলে ক'লা পতাকা হায় হায়, ক'লা পতাকা প্ৰদৰ্শনকাৰী মুৰ্দাবাদ, বিজেপি জিন্দাবাদ, ডঃ হিমন্ত বিশ্ব শৰ্মা জিন্দাবাদ, ক'লা পতাকা প্ৰদৰ্শন কৰা দুষ্কৃতিকাৰীক কঠোৰ শাস্তি বিহক আদি বিভিন্ন শ্লোগান দি নগাঁৱৰ ৰাজপথ কঁপাই তোলে।

যুৱ মৰ্চাৰ নগাঁও জিলা সমিতিৰ সভাপতি প্ৰণৱ বৰা আৰু সাধাৰণ সম্পাদক দাদুল নাথৰ নেতৃত্বত হোৱা এই প্ৰতিবাদী কাৰ্যসূচীৰ জৰিয়তে ক'লা পতাকা প্ৰদৰ্শন কৰাসকলক কঠোৰ সকীয়নি প্ৰদান কৰি কয়- জাতি-মাটি-ভেটি সুৰক্ষাৰ হকে কাম কৰা বিজেপি নেতৃত্বাধীন চৰকাৰৰ বিৰুদ্ধে ষড়যন্ত্ৰত লিপ্ত হ'লে মৰ্চাই ব্যাপক প্ৰতিৰোধ সংগ্ৰাম গঢ়ি তোলিব। তেওঁলোকে ক'লা পতাকা প্ৰদৰ্শনকাৰীসকলৰ বিৰুদ্ধে ৰাইজক সজাগ হ'বলৈ আহ্বান জনায়।