নগাঁৱৰ পাহি মহন্তৰ শিৰত 'অসম সুন্দৰী'ৰ মুকুট

নগাঁৱৰ পৰা ঋতুপৰ্ণ শৰ্মা

নগাঁৱৰ হেভেন ডান্স এণ্ড মডেলিং একাডেমীৰ উদ্যোগত তথা এছ আৰ প্ৰডাকচনৰ সহযোগত আয়োজিত অসম ভিত্তিক সুন্দৰী যুৱতী প্ৰতিযোগিতাত চূড়ান্ত বিজয়ীৰ সন্মান লাভ কৰিছে নগাঁৱৰ মেধাৱী যুৱতী পাহি মহন্তই।নগাঁও চহৰস্থিত খগেন মহন্ত প্ৰেক্ষাগৃহত শুকুৰবাৰে অনুষ্ঠিত সৌন্দৰ্য প্ৰতিযোগিতাখনিত নিজৰ সৌন্দৰ্য আৰু ব্যক্তিত্ব প্ৰদৰ্শন কৰি পাহি মহন্তই আঁজুৰি আনিবলৈ সক্ষম হয় 'অসম সুন্দৰী'ৰ মুকুট।

এই সন্মান লাভৰ ফলস্বৰূপে পাহিয়ে এছ আৰ প্ৰডাকচনৰ বেনাৰত নিৰ্মাণ হ'বলগা এটি হিন্দী গীতৰ এলবামত অভিনয় কৰাৰ সুযোগ লাভ কৰিব।লগতে পাহিয়ে সৌন্দয্য প্ৰতিযোগিতাখনিৰ মহিলা শিতানত 'শ্ৰেষ্ঠ কেটৱাক'ৰ সন্মান বুটলিবলৈ সক্ষম হয়। উল্লেখ্য যে ৰাজ্যৰ বিভিন্ন প্ৰান্তৰ অৰ্ধশতাধিক সুন্দৰী যুৱতীয়ে অংশগ্ৰহণ কৰে এই প্ৰতিযোগিতাখনিত।

নগাঁৱৰ খালৈগাঁও নিৱাসী প্ৰতিষ্ঠিত ব্যৱসায়ী দেৱজিত মহন্ত আৰু পূৰবী মহন্তৰ কন্যা পাহি মহন্ত নগাঁও মহাবিদ্যালয়ৰ প্ৰাণীবিজ্ঞান বিভাগৰ প্ৰথম ষাণ্মাসিকৰ ছাত্ৰী। ভৱিষ্যতে এগৰাকী সফল মডেল তথা অভিনেত্ৰী হোৱাৰ আশা পুহি ৰখা পাহিৰ সাফল্যই পৰিয়ালবৰ্গ আৰু শুভাকাংক্ষীসকলক আনন্দিত কৰি তুলিছে।