তিনিচুকীয়াৰ কৰ্দৈগুৰিত আজিৰে পৰা আন্তঃজিলা কাবাডী

নগাঁৱৰ পৰা ঋতুপৰ্ণ শৰ্মা

তিনিচুকীয়া জিলাৰ তালাপ-কৰ্দৈগুৰি আঞ্চলিক ক্ৰীড়া সন্থাৰ উদ্যোগত আৰু তিনিচুকীয়া জিলা কাবাডী সন্থাৰ তত্ত্বাৱধানত তথা স্থানীয় ৰাইজৰ সহযোগত আজিৰে পৰা তিনিদিনীয়াকৈ  আন্তঃজিলা জুনিয়ৰ পুৰুষ-মহিলাৰ দিবা-নৈশ ৩৮সংখ্যক কাবাডী প্ৰতিযোগিতা অনুষ্ঠিত হৈছে ।

কৰ্দৈগুৰিৰ বৰগড়া আৰু বিষ্ণুপুৰ ৰাজহুৱা খেলপথাৰত আয়োজিত প্ৰতিযোগিতাত মুঠ ৫০টা দলে যোগদানৰ নিশ্চয়তা প্ৰদান  কৰিছে বুলি জানিব পৰা গৈছে । উল্লেখ্য যে প্ৰতিযোগিতাৰ বাবে ১৪ লাখ ৩৭ হাজাৰ ৮০০টকাৰ বাজেট ধাৰ্য কৰা হৈছে ।

খেলসমূহ পৰিচালনা কৰিব- নগাঁৱৰ নাৰফান আলী, ফজৰুল ইছলাম; মৰিগাঁৱৰ ৰমেশ কাকতী, শিলচৰৰ জাহান চৌধাৰী, আহমেদ হুছেইন লস্কৰ; মিৰ্জাৰ মিলন ঠাকুৰীয়া, লক্ষী বড়ো; টংলাৰ নোমল ৰাভা, ভাৰত ৰাভা; সৰভোগৰ চামাদ মণ্ডল, শালবাৰীৰ অমৃত বসুমতাৰী, বাক্সাৰ নাগেশ্বৰ স্বৰ্গীয়াৰী, গোৱালপাৰাৰ দময়ন্তী নাথ, এছ এফ আলী, এছ আই হাজৰিকা; ৰঙিয়াৰ গফুৰ আলী, চৰাইদেউৰ দিলীপ হাজৰিকা, অভিজিৎ গগৈ আৰু ধেমাজিৰ পৱিত্ৰ তালুকদাৰ ।

ইপিনে কাবাডী সন্থাৰ কৰ্মকৰ্তাসকল হৈছে শচীন দেৱ বৰ্মন, দুলাল বসুমতাৰী, হৰিশ গোস্বামী, পৰেশ দাস, বাণেশ্বৰ ব্ৰহ্ম, নুৰুল আমিন, ইউছুফ আলী তালুকদাৰ আৰু সুনীল নাথ । প্ৰতিযোগিতাখনিত  মূল ৰেফাৰীৰ দায়িত্বত থাকিব প্ৰবীণ দাস আৰু বীৰেন কলিতা ।