বৰপেটাত ১০টা শীতলীকৰণ ভঁৰালৰ বাবে কেন্দ্ৰীয় কৃষিমন্ত্ৰীক আহ্বান চিৰাজুদ্দিনৰ

বৃহস্পতিবাৰে কেন্দ্ৰীয় কৃষিমন্ত্ৰী ৰাধামোহন সিঙক নতুন দিল্লীত সাক্ষাৎ কৰি বৰপেটা লোকসভা সমষ্টিৰ সাংসদ চিৰাজুদ্দিন আজমলে কে'বাটাও দাবী সম্বলিত এখন স্মাৰক-পত্ৰ প্ৰদান কৰে ৷

স্মাৰক-পত্ৰখনত সাংসদ আজমলে উল্লেখ কৰে যে বৰপেটা লোকসভা সমষ্টিটো বিভিন্ন নদী-উপনদীৰ উপৰি বিশাল ব্ৰহ্মপুত্ৰ সংযোগী এটা সমষ্টি ৷ প্ৰতি বছৰে প্ৰায় ৭০ হাজাৰ পৰিয়ালে লোকসভা সমষ্টিটোৰ বিশেষকৈ চৰ অঞ্চলৰ কৃষকসকলে শাক-পাচলি বিক্ৰীৰ বাবে ৪-৫ মাহ ধৰি ৰাস্তাৰ কাষত পেলাই থ’বলগীয়া হয় ৷

উচিত মূল্যৰ বাবে অপেক্ষা কৰি কৃষকসকলে সদায় এনেদৰে ডাঙৰ ক্ৰেতাৰ বাবে বাট চাবলগীয়া হয় ৷ কিন্তু এই ডাঙৰ ক্ৰেতা ব্যৱসায়ীসকলে একেবাৰে কম মূল্য দিব বিচাৰে ৷ যাৰফলত সেই মূল্যৰে ন্যূনতম উৎপাদন খচৰখিনিও কৃষকসকলৰ পূৰ্ণ নহয় ৷ ফলত প্ৰতি বছৰেই কৃষকসকল লোকচানৰ সন্মুখীন হৈ আহিছে ৷

কেন্দ্ৰীয় মন্ত্ৰীগৰাকীক স্মাৰক-পত্ৰখনৰ জৰিয়তে কেন্দ্ৰীয় এম আই ডি এইচ কেন্দ্ৰীয় আঁচনিৰ অধীনত বিশেষকৈ বৰপেটা, বঙাইগাঁও জিলাত কৃষকসকলৰ এই উৎপাদিত সামগ্ৰী মজুত কৰি ৰাখিবলৈ ১০টা ৬-৮ টন সামৰ্থ্য থকা সৌৰশক্তিচালিত শীতলীকৰণ ভঁৰাল আবণ্টন দিবলৈ দাবী জনায় ৷