বঙাইগাঁও জিলাৰ অভয়াপুৰীত স্বাস্থ্য মেলাৰ আয়োজন 

বঙাইগাঁও জিলাৰ অভয়াপুৰীত আজি এক মেগা স্বাস্থ্য মেলা অনুষ্ঠিত হয় ৷ সৃজনগ্ৰামৰ অন্তৰ্গত লালমাটিস্থিত শ্ৰীগণেশ উচ্চ মাধ্যমিক বিদ্যালয় প্ৰাংগণত অনুষ্ঠিত এই স্বাস্থ্যমেলাৰ উদ্বোধন কৰে দক্ষিণ অভয়াপুৰী বিধানসভা সমষ্টিৰ বিধায়ক অনন্ত কুমাৰ মালোৱে ৷ অনুষ্ঠানত যুটীয়া স্বাস্থ্য সেৱা সঞ্চালক ডাঃ ৰত্ন বসুমতাৰী, সৃজনগ্ৰাম খণ্ড চিকিৎসা আৰু স্বাস্থ্য বিষয়া আৰু উত্তৰ শালমাৰা মহকুমা চিকিৎসা আৰু স্বাস্থ্য বিষয়াৰ লগতে ৰাষ্ট্ৰীয় স্বাস্থ্য অভিযানৰ বিষয়া-কৰ্মচাৰীসকল উপস্থিত থাকে ৷

বঙাইগাঁও জিলা স্বাস্থ্য সমিতি আৰু ৰাষ্ট্ৰীয় স্বাস্থ্য অভিযানৰ উদ্যোগত তথা সৃজনগ্ৰাম খণ্ড প্ৰাথমিক স্বাস্থ্য কেন্দ্ৰৰ সহযোগত আয়োজিত এই স্বাস্থ্যমেলাত সহস্ৰাধিক ৰোগীৰ বিনামূলীয়া স্বাস্থ্য পৰীক্ষা কৰাৰ লগতে ঔষধ বিতৰণ কৰা হয় ৷ প্ৰতিটো বিভাগৰে বহিঃসেৱা কেন্দ্ৰৰ দ্বাৰা ৰোগীসকলক চিকিৎসা সম্পৰ্কীয় পৰামৰ্শ প্ৰদান কৰা হয় ৷ আনহাতে স্বাস্থ্য মেলাৰ লগত সংগতি ৰাখি এখন সজাগতা সভাৰো আয়োজন কৰা হয় ৷

লগতে বিভিন্ন ষ্টলৰ দ্বাৰা স্বাস্থ্য বিভাগৰ কাম-কাজ প্ৰদৰ্শন কৰা হয় ৷ তাৰ উপৰিও বাটৰ নাটো প্ৰদৰ্শন কৰা হয় ৷ ইপিনে জিলা স্বাস্থ্য সমিতিৰ উদ্যোগত আৰু বঙাইগাঁও খণ্ড প্ৰাথমিক স্বাস্থ্য কেন্দ্ৰৰ সহযোগত জিলাখনৰ বিলাসপুৰ মাধ্যমিক বিদ্যালয়তো আন এখন মেগা স্বাস্থ্য মেলাৰ আয়োজন কৰা হয় ৷