জুৰীয়া বগৰীগুৰিত তিনিটা পিষ্টলসহ দুধৰ্ষ ডকাইত গ্ৰেপ্তাৰ

জুৰীয়াৰ পৰা উত্তম বৰা

নগাঁও জিলাৰ জুৰীয়া বগৰীগুৰিত তিনিটা পিষ্টলসহ এটা ডকাইতক গ্ৰেপ্তাৰ কৰে আৰক্ষীয়ে৷ বিল্লাল উদ্দিন নামৰ ধৃত ডকাইতটোৰ ঘৰ জুৰীয়া কলনি জলাহত৷ ডকাইতটোৰ পৰা দুটা ৭.৬৫ পিষ্টল আৰু এটা পইন্ট ২২ পিষ্টলসহ এঘাৰ জাঁই সজীৱ গুলী জব্দ কৰে আৰক্ষীয়ে৷

দুধৰ্ষ ডকাইতটোৱে তিনিটা পিষ্টল বিক্ৰীৰ বাবে যো-জা চলাওতেই নগাঁও আৰক্ষীয়ে গোপন খবৰৰ ভিত্তিত বুধবাৰে গ্ৰেপ্তাৰ কৰে৷ কিছুদিন পূৰ্বে এটা ডকাইতিৰ গোচৰত গ্ৰেপ্তাৰ হোৱা বিল্লালে এমাহ পূৰ্বে কাৰাগাৰৰ পৰা জামিনত মুক্তি পোৱাৰ পিছতে অবৈধ অস্ত্ৰ ব্যৱসায়ৰ লগত জড়িত হৈছিল৷ এই তথ্য লাভ কৰি নগাঁও আৰক্ষীৰ উপ-আৰক্ষী অধীক্ষক জন দাস, মানস শইকীয়াই চিআৰপিএফৰ সহযোগত চলাইছিল অভিযান৷