ভূপেন হাজৰিকাৰ মৃত্যু দিৱস উপলক্ষে ৰচনা প্ৰতিযোগিতা

নগাঁৱৰ পৰা ঋতুপৰ্ণ শৰ্মা

নগাঁও চহৰৰ সমীপৰ মিলনপুৰৰ আদৰ্শ নগৰ আঞ্চলিক সাংস্কৃতিক চ'ৰাৰ সৌজন্যত বিগত বছৰৰ দৰে এইবাৰো অহা ৫ নৱেম্বৰত  সুধাকণ্ঠ ডঃ ভূপেন হাজৰিকাৰ মৃত্যু দিৱসটি আয়োজন কৰা হৈছে ।

এই উপলক্ষে সদৌ অসম ভিত্তিত বিদ্যালয়, মহাবিদ্যালয় আৰু বিশ্ববিদ্যালয় পৰ্যায়ত দুখন ৰচনা প্ৰতিযোগিতাৰ আয়োজন কৰা হৈছে । ৰচনা প্ৰতিযোগিতাৰ বিষয়বস্তু হৈছে-বিদ্যালয় পৰ্যায়ৰ বাবে "আপুনি ভূপেন হাজৰিকাৰ আটাইতকৈ কোনটো গান ভালপায় আৰু কিয় ভালপায়" আৰু মহাবিদ্যালয় তথা বিশ্ববিদ্যালয় পৰ্যায়ৰ বাবে "ভূপেন হাজৰিকাৰ গীতত বিশ্ব ভ্ৰাতৃত্ববোধ" ।

বিদ্যালয় পৰ্যায়ৰ ৰচনাসমূহ ২০০ শব্দ আৰু মহাবিদ্যালয়-বিশ্ববিদ্যালয় পৰ্যায়ত ৩০০-৩৫০ শব্দৰ ভিতৰত হ'ব লাগিব । ৰচনাসমূহ অসমীয়া আৰু ইংৰাজী যিকোনো এটা ভাষাত লিখিব পাৰিব । উল্লেখ্য যে ৫ নৱেম্বৰৰ  ডঃ ভূপেন হাজৰিকাৰ মৃত্যু দিৱসটিৰ দিনা কণ কণ ল'ৰা-ছোৱালীৰ মাজত চিত্ৰাংকন, গীত-মাতৰ সন্ধিয়াৰ লগতে সুধাকণ্ঠৰ দ্বাৰা পৰিচালিত এখন কথাছবি প্ৰদৰ্শন কৰা হ'ব বুলি সভাপতি হেম শৰ্মা আৰু প্ৰবীণ হাজৰিকাই জনাইছে ।

ইচ্ছুক প্ৰতিযোগীয়ে ৰচনাসমূহ অহা ৫ নৱেম্বৰৰ পূৰ্বে সম্পাদক, আদৰ্শ নগৰ আঞ্চলিক সাংস্কৃতিক চ'ৰা, মিলনপুৰ, ডাকঘৰ- নগাঁও, জিলা- নগাঁও, পিন- ৭৮২০০১ এই ঠিকনাত প্ৰেৰণ কৰিব লাগিব । সবিশেষ জানিবৰ বাবে ৯৪৩৫৮১২২৯৮ আৰু ৯১০১৮৫১০৩৭ নম্বৰত যোগাযোগ কৰিবলৈ আহ্বান জনাইছে ।