মূল্যবৃদ্ধিৰ প্ৰতিবাদত কমিউনিষ্ট পাৰ্টীৰ বিক্ষোভ কাৰ্যসূচী

পেট্ৰ'ল-ডিজেলৰ মূল্যবৃদ্ধিৰ লগতে যাত্ৰীবাহী বাছৰ ভাড়া বৃদ্ধিৰ বিৰোধিতা কৰি আজি গুৱাহাটী মহানগৰীত ভাৰতীয় কমিউনিষ্ট পাৰ্টী আৰু নিখিল ভাৰত ছাত্ৰ ফেডাৰেচন, গুৱাহাটী মহানগৰ সমিতিয়ে এক বিক্ষোভ প্ৰতিবাদী কাৰ্যসূচী ৰূপায়ণ কৰে ।

মহানগৰীৰ গুৱাহাটী ক্লাবৰ পৰা আৰম্ভ হোৱা এই প্ৰতিবাদী কাৰ্যসূচীত অংশগ্ৰহণ কৰে ভালেসংখ্যক ছাত্ৰ-ছাত্ৰীৰ লগতে চি পি আই দলৰ মহানগৰ জিলা পৰিষদৰ একাংশ বিষয়ববীয়াই । তেওঁলোকৰ দাবী, পেট্ৰ'ল-ডিজেলৰ ওপৰত আৰোপ কৰা কৰৰ পৰিমাণ ১০ টকাকৈ প্ৰতি লিটাৰ হ্ৰাস কৰা আৰু মহানগৰীত চলাচল কৰা চিটী বাছ আৰু দূৰণিবটীয়া যাত্ৰীবাহী বাছৰ ভাড়া ৩০ শতাংশ বৃদ্ধিৰ প্ৰত্যাহাৰ কৰা ।

ইয়াৰ উপৰি চিটী বাছসমূহত ছাত্ৰ-ছাত্ৰীৰ বাবে ৭০ শতাংশ ভাড়া ৰেহাই দিয়াৰ লগতে প্ৰতিবন্ধী, বৃদ্ধসকলৰ চিটী বাছৰ ভাড়া ন্যূনতম ৫ টকা বাহাল ৰখাৰ দাবীৰে পৰিবেশ উত্তাল কৰি তোলে ।

ইয়াৰ উপৰি কেৰাচিনমুক্ত অসমৰ শ্লোগান অতি সোনকালে প্ৰত্যাহাৰ কৰি সুলভ মূল্যৰ দোকানৰ জৰিয়তে কেৰাচিন যোগান অব্যাহত ৰখাৰো দাবী জনায় ।

ভাৰতীয় কমিউনিষ্ট দলৰ মহানগৰ জিলা পৰিষদৰ সম্পাদক চক্ৰেশ্বৰ কলিতাই জানিবলৈ দিয়ে যে প্ৰতিবাদৰ অন্তত কামৰূপ মেট্ৰ' জিলা উপায়ুক্তৰ জৰিয়তে ৰাজ্যৰ মুখ্য মন্ত্ৰীলৈ তেওঁলোকৰ দাবীসম্বলিত এক স্মাৰক-পত্ৰ প্ৰদান কৰে ।