ভক্তি সংগীতত নগাঁও জিলালৈ গৌৰৱ কঢ়িয়ালে চালু কৌৰে 

নগাঁৱৰ পৰা ঋতুপৰ্ণ শৰ্মা
ৰাজ্যখনত শিখ সম্প্ৰদায়ৰ উঠি অহা প্ৰজন্মৰ মাজত ভক্তিসংগীতক জনপ্ৰিয় কৰাৰ লগতে স্ব-ধৰ্মৰ নীতি-নিয়ম, আচাৰ-ৰীতিৰ প্ৰতি আগ্ৰহান্বিত কৰাৰ মানসেৰে সদৌ অসম শিখ যুৱ সংস্থাৰ উদ্যোগত অনুষ্ঠিত ৰাজ্যিক ভিত্তিত শ্ৰৱণ-কীৰ্তণ ভক্তি সংগীত প্ৰতিযোগীতাত নগাঁৱৰ সংগীত শিল্পী কুকীল কন্ঠী গায়িকা চালু কৌৰে শ্ৰেষ্ঠ প্ৰদৰ্শনেৰে প্ৰথম পুৰস্কাৰ লাভ কৰিবলৈ সক্ষম হৈছে ৷ 

সদৌ অসম শিখ যুৱ সংস্থাৰ কেন্দ্ৰীয় সমিতিৰ উদ্যোগত অসমৰ ভিন্ন মহকুমা আৰু জিলা ভিত্তিত অনুষ্ঠিত কৰা এই বৃহৎ ভক্তিসংগীত প্ৰতিযোগীতাত সহস্ৰাধিক প্ৰতিযোগীয়ে ভাগ লয় ৷ প্ৰথম ৰাউণ্ডত প্ৰত্যেক মহকুমা-জিলাৰ পৰা বাচনি কৰা হয় শ্ৰেষ্ঠ প্ৰতিযোগীৰ পেনেলে ৷ শেষ পৰ্যায়ত ৰাজ্যিক ভিত্তিত বাচনিকৃত প্ৰতিযোগীসকলৰ মাজত হয় চূড়ান্ত প্ৰতিযোগীতা ৷ চূড়ান্ত প্ৰতিযোগীতাত নগাঁও জ'নৰ পৰা অংশগ্ৰহন কৰা শিল্পী চালু কৌৰে প্ৰথম পুৰস্কাৰ লাভ কৰি জিলাখনলৈ গৌৰৱ কঢ়িয়াই আনে ৷

 ঐতিহাসিক শিৱসাগৰত অনুষ্ঠিত সংগীত সন্ধিয়াত সদৌ অসম শিখ যুৱ সংস্থাৰ বিষয়ববীয়াসকলে এক আড়ম্বৰপূৰ্ণ অনুষ্ঠানত শিল্পী চালু কৌৰক সম্বৰ্ধনা জ্ঞাপন কৰাৰ লগতে প্ৰথম পুৰস্কাৰ আৰু মান-পত্ৰ প্ৰদান কৰে ৷ এই সংগীত সন্ধিয়াত উত্তৰ-পূৰ্বাঞ্চলৰ বিভিন্ন ঠাইৰ শিখ যুৱ শিল্পীৰ দলে ভাঙৰা, গিৰ্ধা, শ্ৰৱণ কীৰ্তণ ভক্তিগীত আদি পৰিবেশন কৰে ৷ 

নগাঁৱৰ সংগীত শিল্পী চালু কৌৰৰ এই সফলতাত জিলাবাসী বিশেষভাৱে শিখ সম্প্ৰদায়ৰ লোকসকলে গৌৱৰবোধ কৰি শিল্পীগৰাকীৰ ভৱিষ্যত উজ্বল কামনা কৰি শুভেচ্ছা আৰু শুভাকমনা জ্ঞাপন কৰিছে ৷