ভিলেজ ৰকষ্টাৰ মুক্তিৰ প্ৰাক্‌মুহূৰ্তত আজি ৰিমা দাসৰ সংবাদমেল সম্বোধন

অস্কাৰৰ বাবে ভিলেজ ৰকষ্টাৰ ছবিখন মনোনীত হোৱাৰ বাবে পৰিচালক ৰিমা দাস যথেষ্ট আনন্দিত । ইয়াৰ বাবে তেওঁ ছ'চিয়েল মিডিয়া আৰু সংবাদ মাধ্যমক ধন্যবাদ জ্ঞাপন কৰে ৷

আজি গুৱাহাটী প্ৰেছ ক্লাবত আয়োজিত এক সংবাদমেলযোগে অস্কাৰৰ বাবে মনোনীত ভিলেজ ৰকষ্টাৰ ছবিৰ পৰিচালক ৰিমা দাসে এই কথা ব্যক্ত কৰে ৷ সংবাদমেলখনত ৰিমা দাসে সংবাদ মাধ্যমৰ আগত ব্যক্ত কৰে ভিলেজ ৰকষ্টাৰ ছবিৰ বহুতো কথা ।

তেওঁ প্ৰকাশ কৰে যে ভিলেজ ৰকষ্টাৰৰ বাবে চাৰি বছৰ দৃশ্যগ্ৰহণ কৰা হৈছিল আৰু ইয়াৰ দৃশ্যগ্ৰহণ ছয়গাঁৱত হৈছিল । এই সময়খিনিত তেওঁৰ একমাত্ৰ অস্ত্ৰ আৰু লগৰী কেমেৰাটোৱে আছিল বুলিও তেওঁ জনায় ।

বৰ্তমান ছবিখনৰ বাবে সকলোৱে তেওঁক যেনেদৰে আৰ্থিকভাৱে সহায় কৰিছে সেয়া দেখি তেওঁৰ অস্কাৰ পোৱাৰ দৰেই অনুভৱ হৈছে বুলিও নিজৰ অনুভূতি ব্যক্ত কৰে । আনহাতে, অসম চৰকাৰে ছবিখনৰ আমোদ কৰ ৰেহাই দিয়াৰ লগতে ৫০ লাখ টকাৰ আৰ্থিক সাহায্যৰ বাবে তেওঁ অসম চৰকাৰক ধন্যবাদ জনায় ।

অতি সৰলতাৰে ৰিমা দাসে সাধাৰণ মানুহৰ মৰম দেখি তেওঁলোকৰ পৰা ছবিখন চোৱাৰ বাবদ পইচা ল'বলৈ ভাল লগা নাই বুলিও সংবাদমেলখনত সদৰী কৰে । আজিৰ সংবাদমেলত ৰিমা দাসৰ লগতে উপস্থিত থাকে বাণী দাস ৷

বাণী দাসে ভিলেজ ৰকষ্টাৰ ছবিখনৰ বিষয়ে ব্যাখ্যা কৰি কয় যে এইখন অসমীয়া মানুহৰ, আমাৰ ছবি হৈছে । গতিকে আমি টিকট কাটি এই ছবিখন চাম । লগতে শুকুৰবাৰে সন্ধিয়া ৭ বজাত মহানগৰীৰ অনুৰাধা ছবিগৃহত এখন সংবাদমেল আয়োজন কৰাৰ কথাও উল্লেখ কৰে বাণী দাসে ।

সংবাদমেলৰ অন্তত সকলোৱে মিলি টিকট কাটি ভিলেজ ৰকষ্টাৰ ছবিখন উপভোগ কৰাৰ কথাও জানিবলৈ দিয়ে ।