যাদুপ্ৰেমীৰ বাবে সু-খবৰ : যাদু সম্ৰাট বিক্ৰমৰ যাদু থিয়েটাৰৰ শুভাৰম্ভণি ৮ অক্টোবৰত

যাদুৰ জগতত এক অভিনৱ সংযোগ ৷ ভ্ৰাম্যমাণৰ ৰূপত এইবাৰ যাদুৰ পৃথিৱী । যাদু সম্ৰাট বিক্ৰমৰ 'মায়া মেজিক থিয়েটাৰ' । অসমত প্ৰথমবাৰৰ বাবে অত্যাধুনিক ৰূপত সাজু ভ্ৰাম্যমাণ যাদু প্ৰদৰ্শনী ।

যাদুক জনপ্ৰিয় কৰাৰ স্বাৰ্থতে যাদু সম্ৰাট বিক্ৰমে এক বিশেষ প্ৰচেষ্টা হাতত লৈছে । যাদুকলাক লৈ যোৱা হ'ব ৰাইজৰ পদূলিমুখলৈ । অসমৰ ভ্ৰাম্যমাণ নাট্যদলৰ আৰ্হিত সাজু কৰি তোলা হৈছে মায়া মেজিক থিয়েটাৰ ।

৩০০ আৰু ৫০০ আসনযুক্ত এই ভ্ৰাম্যমাণ যাদুৰ প্ৰেক্ষাগৃহত অত্যাধুনিক পোহৰ আৰু শব্দৰ কাৰুকাৰ্য সংযোজন কৰা হৈছে । যাদু সম্ৰাট বিক্ৰমে জানিবলৈ দিয়ে যে এই ভ্ৰাম্যমাণ যাদু থিয়েটাৰৰ প্ৰদৰ্শনী তিনিদিনীয়া ।

তেওঁলোকৰ মাননী প্ৰতিটো দিনত মাত্ৰ ৪০,০০০ টকা বুলিও তেওঁ জানিবলৈ দিয়ে । তেওঁলোকৰ এই দলত থাকিব বিশেষ প্ৰশিক্ষণপ্ৰাপ্ত ১২জন সদস্য । এই ভ্ৰাম্যমাণ যাদু থিয়েটাৰৰ শুভাৰম্ভণি হ'ব ৮ অক্টোবৰত ৷

ইতিমধ্যে ২০১৮-১৯ বৰ্ষৰ যাদু প্ৰদৰ্শনীৰ বাবে ৰাজ্যৰ বিভিন্ন প্ৰান্তত উপস্থিত হ'ব এই দলটো ।