বাংগালুৰুত ভয়ংকৰ অগ্নিকাণ্ড : জুইত জাহ গ'ল শতাধিক দুই-চাৰিচকীয়া বাহন

বাংগালুৰুত চলি থকা এয়াৰ শ্ব'ত অঘটন৷ ভয়ংকৰ অগ্নিকাণ্ডত জাহ গ'ল শতাধিক বাহন৷ এয়াৰ শ্ব'ৰ পাৰ্কিং স্থানত সংঘটিত হয় এই অগ্নিকাণ্ড৷ অগ্নিকাণ্ডই নিমিষতে গ্ৰাস কৰে দুচকীয়া-চাৰিচকীয়া বাহনসমূহক৷ চিগাৰেটৰ পৰা অগ্নিকাণ্ডৰ সূত্ৰপাত হোৱাৰ সন্দেহ৷ আজি দিনৰ প্ৰায় ১.৩০ বজাত সংঘটিত হয় এই দুৰ্ঘটনা৷ উত্তৰ বাংগালুৰুৰ য়ালাহেনকা এয়াৰ বেছত সংঘটিত হয় এই দুৰ্ঘটনা, য'ত প্ৰায় ১০০খন এয়াৰ ক্ৰাফট পাৰ্কিং কৰি থোৱা আছিল৷

উল্লেখ্য যে ইয়াতে অনুষ্ঠিত হৈ আছে ২০১৯ বৰ্ষৰ দ্বি-বাৰ্ষিক এয়ৰ' ইণ্ডিয়া কাৰ্যসূচী৷ সমগ্ৰ অঞ্চলটোৰ আকাশ ক'লা ধোঁৱাই ছানি ধৰে৷ এগৰাকী জ্যেষ্ঠ আৰক্ষী বিষয়াই প্ৰকাশ কৰামতে, শুকান ঘাঁহ আৰু তীব্ৰ বতাহৰ বাবে জুয়ে তীব্ৰ ৰূপ ধাৰণ কৰি এফালৰ পৰা গ্ৰাস কৰে বাহনসমূহ৷ অৱশ্যে জুই নিয়ন্ত্ৰণ কৰিবলৈ সক্ষম হৈছে অগ্নিনিৰ্বাপক বাহিনীয়ে৷ দুৰ্ঘটনাটোত কোনো লোক হতাহত হোৱা নাই বুলি জানিব পৰা গৈছে৷