সমুখ-সমৰৰ দিশে বিজেপি-কংগ্ৰেছ : ৰাজীৱ ভৱনৰ সন্মুখত উপস্থিত বিজেপি কৰ্মী

ৰাফেল ক্ৰয় বিতৰ্ক সন্দৰ্ভত কংগ্ৰেছে মিথ্যাচাৰৰ আশ্ৰয় লোৱাৰ অভিযোগত আজি বিজেপিয়ে দেশজুৰি কংগ্ৰেছৰ ৰাজ্যিক কাৰ্যালয় ঘেৰাও কাৰ্যসূচী গ্ৰহণ কৰিছে ৷

অসমতো ৰাজ্যিক বিজেপিয়ে হাতত লৈছে এই কাৰ্যসূচী ৷ ইতিমধ্যে বিজেপিৰ বহুসংখ্যক নেতা-কৰ্মীয়ে পুৱাৰ ভাগত গোপাল বড়ো খেলপথাৰত এক প্ৰতিবাদী কাৰ্যসূচী গ্ৰহণ কৰি ৰাজীৱ ভৱন অভিমুখে যাত্ৰা কৰে ৷

ইতিমধ্যে বিজেপিৰ প্ৰতিবাদকাৰীসকল গৈ ৰাজীৱ ভৱনৰ সন্মুখত উপস্থিত হৈছে ৷ উল্লেখ্য যে বিজেপিক ৰুধিবলৈ পুৱাৰে পৰা কংগ্ৰেছৰ বিভিন্ন পৰ্যায়ৰ নেতা-কৰ্মীসকল ৰাজীৱ ভৱনত অৱস্থান কৰিছে ৷

কটকটীয়া নিৰাপত্তা ব্যৱস্থাৰে সষ্টম হৈ আছে নিৰাপত্তাৰক্ষীসকল ৷ বিজেপিক ৰাজীৱ ভৱনত প্ৰৱেশত বাধা দিবলৈ বেৰিকেড তৈয়াৰ কৰি ৰাজীৱ ভৱনৰ পথ বন্ধ কৰি দিয়ো হৈছে ৷

এতিয়া যেন দুয়োটা দল সমুখ-সমৰতহে অৱতীৰ্ণ হ'ব ওলাইছে ৷ যিকোনো অপ্ৰীতিকৰ পৰিস্থিতিৰ আশংকাও কৰা হৈছে ৷ অৱশ্যে পৰিস্থিতি নিয়ন্ত্ৰণৰ বাবে আৰক্ষী-প্ৰশাসনে সম্পূৰ্ণ ব্যৱস্থা হাতত লোৱা পৰিলক্ষিত হৈছে ৷