জীৱন ৰাম মুংগী দেৱী গোৱেংকা সোঁৱৰণি বঁটা ঘোষণা

জীৱন ৰাম মুংগী দেৱী গোৱেংকা সোঁৱৰণি ৰাজহুৱা দাতব্য ন্যাসে প্ৰত্যেক বৰ্ষৰ দৰে এইবাৰো অহা ১৫ ডিচেম্বৰৰ দিনা ৰাজ্যখনৰ ৫গৰাকী বিশেষ ব্যক্তিক প্ৰদান কৰিব এই বর্ষৰ জীৱনজোৰা সাধনা বঁটা ।

সাহিত্য আৰু সাস্কৃতিক ক্ষেত্ৰত উৎকৰ্ষতাৰ বাবে প্ৰদান কৰা এই জীৱনজোৰা বঁটা এইবাৰ লাভ কৰিব বিশিষ্ট চলচ্চিত্ৰ পৰিচালক মুনিন বৰুৱা (মৰণোত্তৰভাৱে), প্ৰসিদ্ধ সাহিত্যক-গৱেষক ডঃ নগেন শইকীয়া, পৰিচালক-অভিনেতা কুলদা কুমাৰ ভট্টাচাৰ্য, শিল্পী সুদক্ষিণা শৰ্মা আৰু চলচ্চিত্ৰ কলা-কুশলী বাপী সেনগুপ্ত ।

উল্লেখ্য যে এই বঁটাৰ সৈতে আছে অংগ বস্ত্ৰ, স্মাৰক আৰু ৫০ হাজাৰ টকা নগদ ধন । মাছখোৱাৰ প্ৰাগজ্যোতিষ সাংষ্কৃতিক প্ৰকল্পৰ প্রেক্ষাগৃহত বঁটা প্ৰদান কৰিবলগা অনুষ্ঠানত সম্বৰ্ধনা জনোৱা হ'ব ৯গৰাকীকৈ বিশেষ ব্যক্তিক ।

ইফালে এই সম্বৰ্ধনা অনুষ্ঠানতে দৌৰৰাণী হিমা দাস আৰু ৰাইফল শ্বুটাৰ হৃদয় হাজৰিকাক ৫০ হাজাৰ টকাকৈ সাহায্য প্ৰদান কৰা হ'ব । এই কথা আজি সংবাদমেলযোগে জানিবলৈ দিয়ে বঁটা বাছনি সমিতিৰ সদস্য, অভিনেত্ৰী মঞ্জু বৰা, মঞ্জুলা বৰুৱা প্ৰমুখ্যে হীৰেণ বৰা, শংকৰলাল ৱেংকাৰে ।

এই অনুষ্ঠানতে জুবিন গাৰ্গে সন্ধিয়া গীত পৰিৱেশন কৰিব বুলিও জানিবলৈ দিয়ে আয়োজক সমিতিয়ে ।