২৯ নৱেম্বৰৰ পৰা গুৱাহাটী বিশ্ববিদ্যালয়ত দুদিনীয়া চলচ্চিত্ৰ মহোৎসৱ

গুৱাহাটী বিশ্ববিদ্যালয়ৰ যোগাযোগ আৰু সাংবাদিকতা বিভাগৰ সোণালী জয়ন্তী বর্ষৰ লগত সংগতি ৰাখি অহা ২৯ আৰু ৩০ নৱেম্বৰত আয়োজন কৰা হৈছে জোনাকী চলচ্চিত্ৰ মহোৎসৱ ।

প্ৰথমবাৰৰ বাবে বিশ্ববিদ্যালয়খনৰ সাংবাদিকতা বিভাগে আয়োজন কৰা এই চলচ্চিত্ৰ মহোৎসৱখন অনুষ্ঠিত কৰা হ'ব বিশ্ববিদ্যালয়খনৰ ফণীধৰ বৰুৱা ছেমিনাৰ হলত । দুদিনীয়া কাৰ্যসূচীৰে আয়োজন কৰা চলচ্চিত্ৰ মহোৎসৱখনত সমাহাৰ ঘটিব উত্তৰ-পূৰ্বাঞ্চলৰ বিভিন্ন কথাছবি ।

ইয়াৰ উপৰি এই অনুষ্ঠানত ছবি নিৰ্মাণ সম্পৰ্কীয় এখন আলোচনা-চক্ৰও অনুষ্ঠিত হ'ব । উল্লেখ্য যে উত্তৰ-পূৰ্বাঞ্চলৰ আঞ্চলিক ভাষাৰ ছবিসমূহক এখন মঞ্চ দিয়াৰ বাবে অনুষ্ঠিত কৰা চলচ্চিত্ৰ মহোৎসৱক লৈ এতিয়া বিশ্ববিদ্যালয়খনত দেখিব পোৱা গৈছে এক আনন্দমুখৰ পৰিবেশ ।

ইফালে এই চলচ্চিত্ৰ মহোৎসৱৰ সামৰণিৰ দিনা উপস্থিত থাকিব নৱ-প্ৰজন্মৰ হাৰ্টথ্ৰৱ জুবিন গাৰ্গ । তাকে লৈ এতিয়া কৃষ্ণচূড়াৰ নগৰীত দেখিবলৈ পোৱা গৈছে ব্যাপক প্ৰস্তুতি ।