সত্ৰীয়া সংস্কৃতিৰ অন্যতম সাধক লক্ষ্মীপ্ৰসাদ দেৱ গোস্বামীৰ দেহাৱসান

নিউজ ডেস্ক:
অসমৰ সত্ৰীয়া সংস্কৃতিৰ অন্যতম সাধক তথা পশ্চিম শিলপুখুৰী আদৰ্শ উচ্চতৰ মাধ্যমিক বিদ্যালয়ৰ অধ্যক্ষ লক্ষ্মী প্ৰসাদ দেৱ গোস্বামীয়ে আজি পুৱা ৫বজাত শেষ নিশ্বাস ত্যাগ কৰে।গুৱাহাটীৰ এখন ব্যক্তিগত চিকিৎসালয়ত শেষ নিশ্বাস ত্যাগ কৰে গোস্বামীয়ে।মৃত্যুৰ সময়ত তেখেতৰ বয়স হৈছিল ৫৮বছৰ। 
যোৱা ২০ জুলাইত নগাঁৱত হোৱা এক পথ দুৰ্ঘটনাত গুৰুতৰভাৱে আহত হৈ চিকিৎসাধীন হৈ আছিল।মৰিগাঁও জিলাৰ শ্ৰী শ্ৰী নৰোৱা কুজিসত্ৰত ১৯৬৩ চনত  জন্ম গ্ৰহণ কৰা প্ৰ‌য়াত গোস্বামী সত্ৰখনৰ অন্যতম গুৰীয়াল আছিল।শংকৰী কৃষ্টি সংস্কৃতিত দক্ষতা থকাৰ লগতে গায়ন-বায়ন, সূত্ৰধাৰ আৰু নাম লগুৱা হিচাপে খ্যাতি অৰ্জন কৰিবলৈ সক্ষম হৈছিল তেওঁ। তদুপৰি অসম সাহিত্য সভাৰ মৰিগাঁও জিলা সমিতিৰ উপ সভাপতি, শ্ৰী শ্ৰী শংকৰদেৱ কলাকেন্দ্ৰৰ প্ৰতিষ্ঠাপক সম্পাদক, ৰংমিলি বিহু সন্মিলনৰ প্ৰতিষ্ঠাপক আছিল।নগাঁও মৰিগাঁও জিলাৰ বিভিন্ন সত্ৰীয়া অনুষ্ঠানৰ লগতে সামাজিক অনুষ্ঠানৰে ঘনিষ্ঠভাৱে জড়িত গোস্বামীৰ মৃত্যুৰ খবৰে সমগ্ৰ জিলা দুখনত শোকৰ ছাঁ পেলাইঅছে ৷অসম সত্ৰ মহাসভাৰ প্ৰধান সম্পাদক কুসুম কুমাৰ মহন্তই লক্ষ্মী প্ৰসাদ দেৱ গোস্বামীৰ মৃত্যুত গভীৰ শোক প্ৰকাশ কৰি অসমৰ সত্ৰ সমাজৰ অপূৰণীয় ক্ষতি বুলি অভিহিত কৰে ।তদুপৰি গোস্বামীৰ মৃত্যুত সদৌ অসম উচ্চতৰ মাধ্যমিক বিদ্যালয়ৰ অধ্যক্ষ ফৰাম, অসম কৰ্মচাৰী পৰিষদ, শ্ৰী শ্ৰী নৰোৱা কুজিসত্ৰৰ শ্ৰীমন্ত শংকৰদেৱ কলাকেন্দ্ৰ , শ্ৰী শ্ৰী মাধৱদেৱ পুথিভঁৰাল, কুজিসত্ৰ সৌমাৰ সংঘ, অসম সাহিত্য সভাৰ নগাঁও আৰু মৰিগাঁও জিলা সমিতি, পশ্চিম শিলপুখুৰী আদৰ্শ উচ্চতৰ মাধ্যমিক বিদ্যালয়ৰ শিক্ষক-কৰ্মচাৰী সকলে গভীৰ শোক প্ৰকাশ কৰিছে।