গুৱাহাটীৰ আমবাৰীত বনৰীয়া গাহৰিৰ আক্ৰমণত আহত ৪জন

*বনৰীয়া গাহৰিৰ সন্ধানত বন বিভাগৰ অভিযান*

গুৱাহাটী মহানগৰীত বন গাহৰিৰ সন্ত্ৰাস।দুটাকৈ বনৰীয়া গাহৰিৰ আক্ৰমণত আহত হৈছে চাৰিজন লোক।শনিবাৰে সংঘটিত হৈছে এই আক্ৰমণ।

খবৰ অনুসৰি গুৱাহাটীৰ আমবাৰীৰ গুৱাহাটী প্ৰেছ ক্লাব আৰু তাৰ কাষতে থকা হস্ততাঁঁত বস্ত্ৰশিল্প বিভাগৰ কাৰ্যযালয়ত সন্ত্ৰাস সৃষ্টি কৰে প্ৰকাণ্ড বনৰীয়া গাহৰি দুটাই।প্ৰৱেশ কৰিয়েই সন্ত্ৰাস চলায় দুয়োটা গাহৰিয়ে।গাহৰিৰ আক্ৰমণত গুৰুতৰভাৱে আহত হোৱা লোককেইজন হৈছে গুৱাহাটী প্ৰেছ ক্লাবৰ চাফাই কৰ্মী ৰাজেন্দ্ৰ লহকৰ,টেক্সটাইলৰ কৰ্মচাৰী লক্ষী বড়ো,পুৰাতত্ব বিভাগৰ দুই কৰ্মচাৰী মকলেছ আলী আৰু কৰুণা বৰ্মন।

উল্লেখ যে গুৰুতৰভাৱে আহত ১ জনক ভৰ্তি কৰোৱা হৈছে মহেন্দ্ৰ মোহন চৌধুৰী চিকিৎসালয়ত,১জনক গুৱাহাটী মেডিকেল কলেজ হাস্পতাল আৰু ২জনক 
ৱিনট্র'ব চিকিৎসালয়ত ভৰ্তি কৰোৱা হৈছে।

পুৱা প্ৰায় ৮.৪৫ বজাত সংঘটিত হোৱা বনৰীয়া গাহৰিৰ সন্ত্ৰাসৰ পিছত আৰক্ষী আৰু বন বিভাগৰ লোক ঘটনাস্থলীত উপস্থিত হয় যদিও সন্ধান লাভ কৰা নাই সন্ত্ৰাস সৃষ্টি কৰা গাহৰি দুটাৰ।গুৰুত্বপূৰ্ণ যে শুকুৰবাৰে বামুনিমৈদামত ৰাইজে প্ৰত্যক্ষ কৰিছিল গাহৰি দুটাক।