সাংবাদিক-সমাজকৰ্মী মজিবুৰ ৰহমানলৈ সদৌ অসম গৰীয়া যুৱ-ছাত্ৰ পৰিষদৰ 'বাঘ হাজৰিকা সম্প্ৰীতি বঁটা' 

সদৌ অসম গৰীয়া যুৱ-ছাত্ৰ পৰিষদে ২০১৯ বর্ষৰ বাঘ হাজৰিকা সম্প্ৰীতি বঁটা ঘোষণা কৰিছে।জ্যেষ্ঠ সাংবাদিক তথা সমাজকর্মী মজিবুৰ ৰহমানক সংগঠনটোৱে এই বৰ্ষত প্ৰদান কৰিব এই বঁটা।সংগঠনটোৰ উপ-সভাপতি আজিজুৰ ৰহমানে জানিবলৈ দিয়া অনুসৰি জ্যেষ্ঠ সাংবাদিক তথা সমাজকর্মী মজিবুৰ ৰহমানে নিজৰ প্ৰচেষ্টাৰে সমাজৰ আৰ্তজনক সহায় কৰাৰ বাবে 'শান্তি নিৰ্বাস অনাথ আশ্ৰম' মুকলি কৰি সেৱা আগবঢ়াই আহিছে।ইয়াৰ উপৰিও তেওঁ সন্তান আৰু সমাজৰ পৰা উপেক্ষিতজনক অন্ন, বস্ত্ৰ আদি প্ৰদান কৰি আহিছে।

ইয়াৰ উপৰিও জ্যেষ্ঠ সাংবাদিকগৰাকীয়ে বৰ্তমানলৈকে সমাজ- অৱহেলিত ২৫ গৰাকীকৈ ব্যক্তিৰ সম্পূৰ্ণ ধৰ্মীয় ৰীতি-নীতিৰে শেষকৃত্য সম্পন্ন কৰিছে।ইয়াৰ উপৰিও এগৰাকী সংবাদকৰ্মী হিচাপে সমাজ, দেশ আৰু জাতিৰ বাবে বিভিন্ন সময়ত সেৱা আগবঢ়াই আহিছে।যাৰ বাবে এই বঁটা তেওঁক এইবাৰ প্ৰদান কৰা হ'ব বুলি জানিবলৈ দিয়ে সংগঠনটোৱে।লগতে জানিবলৈ দিয়া অনুসৰি জ্যেষ্ঠ সাংবাদিকগৰাকীক অহা ৪ ছেপ্টেম্বৰত গুৱাহাটী প্ৰেছ ক্লাবত আনুষ্ঠানিকভাৱে এই বঁটা প্ৰদান কৰিব।বঁটাত আছে নগদ ধন, চেলেং,মানপত্ৰ, শৰাই,জাপি।