বিজেপিৰ জয়ত ফাঁচী বজাৰত আনন্দ-উল্লাস

নিউজ ডেস্ক :

দেশৰ সপ্তদশ লোকসভা নির্বাচনৰ ভোটগণনাত বিজেপি ঐতিহাসিক বিজয়ৰ দিশত আগবাঢ়ি যোৱাত  সমগ্ৰ দেশতে এতিয়া পৰিলক্ষিত হৈছে বিজেপি সমৰ্থকসকলৰ আনন্দৰ বন্যা। পিছপৰি ৰোৱা নাই অসম ৰাজ্যিক বিজেপিৰ সমৰ্থকসকলো।দলৰ ৰাজ্যিক কাৰ্যালয়ৰ লগতে মহানগৰীৰ বাণিজ্য কেন্দ্ৰ  ফাঁচী বজাৰত আজি দেখিবলৈ পোৱা গ'ল আনন্দৰ বন্যা।প্ৰধানমন্ত্ৰী নৰেন্দ্ৰ মোডীৰ নেতৃত্বত দ্বিতীয়বাৰৰ বাবে কেন্দ্ৰত বিজেপি দলে চৰকাৰ গঠনৰ দিশত আগবাঢ়ি যোৱাত ফাঁচী বজাৰত বিজেপিৰ সমৰ্থকসকলে ৰাজপথলৈ ওলাই আহি ফটকা-আতছবাজী ফুটাই আনন্দ- উল্লাস কৰে। 

বিজেপি দলৰ সমৰ্থকসকলৰ লগতে ফাঁচী বজাৰৰ বাণিজ্যিক কেন্দ্ৰ উন্নয়ন সমিতিৰ সদস্যসকলে বিজেপিৰ এই ঐতিহাসিক অগ্ৰগতিৰ আনন্দত ৰাইজৰ মাজত মিঠাই বিতৰণ কৰে।
আনহাতে,জয় শ্ৰীৰাম মৰ্ণিং ৱাকাৰ ক্লাব,শংকৰ ক্লাবৰ সদস্যসকলে টি আৰ ৰোডত  বিজয় সমদল উলিয়াই আনন্দ-উল্লাস কৰে।এই সন্দৰ্ভত ফাঁচী বজাৰৰ বাণিজ্যিক কেন্দ্ৰ উন্নয়ন সমিতিৰ সভাপতি অনিল থাৰেডে কয় যে বিজেপিৰ এই বিজয়ৰ বাবে ১০১ কেজি লাড়ু প্ৰস্তুত কৰা হৈছিল আৰু সেই লাড়ুসমূহ ৰাইজৰ মাজত বিতৰন কৰা হয়। 

আনহাতে, জয় শ্ৰী ৰাম মৰ্ণিং ৱাকাৰ ক্লাবৰ সদস্য পি কে গুপ্তাই কয় যে এই বিজয়ৰ বাবে আজি ৰাইজৰ মাজত ২০০০ লাড়ু বিতৰণ কৰা হয়। 
উল্লেখ্য যে এই আনন্দ উৎসৱত ব্যৱসায়ী বিনোদ জৈন, মনোজ বাঞ্চালী,পদুম চান্দ পাটনিৰ লগতে ভালেসংখ্যক ব্যৱসায়ীয়ে অংশগ্ৰহন কৰে।বিজেপিক এই ঐতিহাসিক বিজয়ৰ দিশত আগবঢ়াই দিয়াত তেওঁলোকে ৰাইজক ধন্যবাদ জনায়।