নাহৰকটীয়াত আৰম্ভ ৰাজ্যিক টাইকোৱানডো চেম্পিয়নশ্বিপ

নামৰূপৰ পৰা সমীৰণ বৰুৱা

নাহৰকটীয়া টাইকোৱানডো সন্থাৰ উদ্যোগত বৃহস্পতিবাৰৰ পৰা নাহৰকটীয়াত অনুষ্ঠিত হৈছে ৩৫সংখ্যক ৰাজ্যিক কেডেট আৰু জুনিয়ৰ টাইকোৱানডো চেম্পিয়নশ্বিপ প্ৰতিযোগিতা ।

নাহৰকটীয়া ক্ৰীড়া সন্থাৰ ইনড'ৰ ষ্টেডিয়ামত অনুষ্ঠিত এই প্ৰতিযোগিতাত কৰিমগঞ্জ, কামৰূপ মেট্ৰ', বাক্সা, নলবাৰী, দৰং, তেজপুৰকে ধৰি ৰাজ্যৰ ২২খন জিলাৰ প্ৰায় ৫৭০গৰাকী খেলুৱৈয়ে অংশগ্ৰহণ কৰে ।

এই উপলক্ষে বৃহস্পতিবাৰে অনুষ্ঠিত হয় প্ৰতিযোগিতাখনিৰ উদ্বোধনী অনুষ্ঠান । অসম চৰকাৰৰ কৃষিমন্ত্ৰী তথা অসম টাইকোৱানডো সন্থাৰ সভাপতি অতুল বৰাই শুভ উদ্বোধন কৰা এই উদ্বোধনী অনুষ্ঠানত অসম টাইকোৱানডো সন্থাৰ সাধাৰণ সম্পাদক হিৰণ্য শইকীয়া, অসম এথ্‌লেটিক সন্থাৰ যুটীয়া সম্পাদক কৰুণজ্যোতি শইকীয়া, স্থানীয় বিধায়ক নৰেণ সোণোৱাল, আন্তঃৰাষ্ট্ৰীয় ৰেফাৰী পৱন শইকীয়া, গোলাপ থাপা, ইমদাদুল হক, দিগন্ত বৰাকে ধৰি ভালেসংখ্যক বিশিষ্ট ব্যক্তি উপস্থিত থাকে ।

উল্লেখ্য যে তিনিদিনীয়াকৈ অনুষ্ঠিত হোৱা এই প্ৰতিযোগিতাৰ অহা ১৩ অক্টোবৰত সামৰণি পৰিব ।