ৰাষ্ট্ৰীয় টাইকোৱানডোত অসমৰ ৯ পদক

নগাঁৱৰ পৰা ঋতুপৰ্ণ শৰ্মা

মধ্য প্ৰদেশৰ জব্বলপুৰত অনুষ্ঠিত দশম ছিনিয়ৰ ৰাষ্ট্ৰীয় টাইকোৱানডো প্ৰতিযোগিতাত পুমছে আৰু ৩৭সংখ্যক ছিনিয়ৰ ৰাষ্ট্ৰীয় কিউৰুগী  চেম্পিয়নশ্বিপত অসমৰ খেলুৱৈয়ে অনবদ্য প্ৰদৰ্শন আগবঢ়ায় ।

এই প্ৰতিযোগিতাখনিত অসমৰ ছোৱালীৰ দলটিয়ে সামগ্ৰিকভাৱে তৃতীয় স্থান অধিকাৰ কৰি আগন্তুক ৰাষ্ট্ৰীয় ক্ৰীড়াত অংশগ্ৰহণ কৰাৰ যোগতা অৰ্জন কৰে । পুমছেৰ ৩০ বছৰৰ অনূৰ্ধ্বৰ শাখাত অসমৰ  মধু কুমাৰী, উন্মনা দাস আৰু হৰ্ষ সিঙে সোণৰ পদক জয় কৰে ।

পুমছেৰ ৩০ বছৰ ব্যক্তিগত শাখাত তাচীন বেগমে ৰূপ, ৬২ কি:গ্ৰা: অনূৰ্ধ্বত ৰেখাৰাণী গগৈয়ে ব্ৰঞ্জ আৰু ৭৩ কি:গ্ৰা: ঊৰ্ধ্বত ৰ'দালি বৰুৱাই সোণৰ পদক অৰ্জন কৰে ।

এই সাফল্যৰ  বাবে  অসম দলৰ সদস্যসকলক টাইকোৱানডো সন্থাই অভিনন্দন জ্ঞাপন কৰে ।