২০১৯ৰ নিৰ্বাচনত দেশৰ বিৰোধী শিবিৰৰ মুখপাত্ৰ হ'ব কানহাইয়া কুমাৰ

বিজেপিৰ ৰাজনীতিক আঘাত কৰাৰ বাবে দেশৰ বিৰোধী শক্তিয়ে এইবাৰ এজন যুৱ নেতাক সন্মুখলৈ আনিব ৷ দিল্লীৰ জৱাহৰলাল নেহৰু বিশ্ববিদ্যালয়ৰ ছাত্ৰ নেতা, শক্তিশালী বক্তা, প্ৰধান মন্ত্ৰী নৰেন্দ্ৰ মোডীক সন্মুখৰ পৰা সমালোচনা কৰিব পৰা যুৱ নেতা কানহাইয়া কুমাৰ ৷

বিহাৰৰ বেগুচৰাইৰ পৰা ২০১৯ৰ লোকসভা নিৰ্বাচনত প্ৰাৰ্থী হিচাপে থিয় হ'ব কানহাইয়া কুমাৰ ৷ বিহাৰৰ চি পি আই দলৰ ৰাজ্যিক সম্পাদক সত্যনাৰায়ণ সিঙে কানহাইয়া কুমাৰক প্ৰাৰ্থিত্ব দিয়াৰ কথা ঘোষণা কৰিছে ৷

কংগ্ৰেছ আৰু আৰ জে ডি দলৰ লগত চি পি আয়ে আলোচনা কৰিছে ৷ আৰ জে ডিৰ নেতা লালু প্ৰসাদ যাদৱে কানহাইয়া কুমাৰক উপযুক্ত প্ৰাৰ্থী হ'ব বুলি মত প্ৰকাশ কৰিছে ৷ বিজেপিক প্ৰতিৰোধ কৰাৰ বাবে বিহাৰৰ গৃহভূমি বেগুচৰাইৰ পৰা কানহাই য়াকুমাৰক দেশৰ ৰাজনীতিৰ সন্মুখৰ শাৰীলৈ অনাৰ বাবে চি পি আই, কংগ্ৰেছ আৰু আৰ জে ডিয়ে ঐক্যবদ্ধভাৱে ৰণকৌশল প্ৰস্তুত কৰিছে ৷

বেগুচৰাই সমষ্টিৰ পৰা ২০১৪ৰ নিৰ্বাচনত বিজেপিৰ প্ৰাৰ্থী ভোলা সিঙে আৰ জে ডিৰ প্ৰাৰ্থী তনভীৰ হাচানক ৫৮,০০০ ভোটৰ ব্যৱধানত পৰাস্ত কৰিছিল ৷ বিজেপিৰ বিৰুদ্ধে জনমত গঠন কৰাৰ বাবে বিৰোধী শক্তিৰ অন্যতম মুখপাত্ৰ তথা বক্তা হ'ব কানহাইয়া কুমাৰ ৷

দেশৰ ৩৫ বছৰৰ তলৰ যুৱক-যুৱতীসকলেই নিৰ্বাচনত মুখ্য ভূমিকা পালন কৰে ৷ ৬৫ শতাংশ ভোটাৰ ৩৫ বছৰৰ তলৰ ৷ ৰাজনৈতিক দলসমূহৰ লক্ষ্য এই যুৱ ভোটাৰসকল ৷

এই দিশটোক লক্ষ্য ৰাখিও যুৱ নেতা কানহাইয়া কুমাৰক বিজেপিবিৰোধী শিবিৰলৈ অনাটো প্ৰয়োজন হৈ পৰিছে দেশৰ বিৰোধী শক্তিৰ ৷