নাৰায়ণপুৰত ৩৫সংখ্যক অভিৰুচি ক্ৰীড়া দিৱস উদ্‌যাপন

নাৰায়ণপুৰৰ ৰংটিত আটাছু ৰংটি আঞ্চলিক সমিতিৰ উদ্যোগত আৰু স্থানীয় ৰাইজৰ সহযোগত ৩৫সংখ্যক অভিৰুচি ক্ৰীড়া দিৱস উদ্‌যাপন কৰা হয় ৷

কাৰ্যসূচী অনুসৰি পুৱা ৮ বজাত পতাকা উত্তোলন কৰে ৰংটি আঞ্চলিক টাই আহোম ছাত্র সন্থাৰ সভাপতি নকুল বুঢ়াগোহাঁয়ে ৷ ইয়াৰ পিছতেই ৯ বজাত স্মৃতি তৰ্পণ কৰে উপেন বৰগোহাঁয়ে আৰু বৃক্ষৰোপণ কৰে মিনেশ্বৰ গগৈয়ে ৷

১০ বজাত সামূহিক দৌৰ আৰু ১১ বজাৰ পৰা বিভিন্ন খেল-ধেমালি অনুষ্ঠিত হয় ৷ আবেলি ৩ বজাত প্ৰাক্তন শিক্ষক জীৱন সন্দিকৈৰ সভাপতিত্বত অনুষ্ঠিত হয় বটাঁ বিতৰণী সভা ৷

উক্ত বটাঁ বিতৰণী সভাত অসম ভলীবল সন্থাৰ কোষাধ্যক্ষ পুতুল হাজৰিকা, লখিমপুৰ জিলা ভলীবল সন্থাৰ সম্পাদক অচ্যুত শইকীয়া, নাৰায়ণপুৰ প্ৰেছ ক্লাবৰ সম্পাদক দীপান্ত কাকতি, জেষ্ঠ সাংবাদিক জগত গগৈ, সাংবাদিক প্ৰদীপ বৰা, যুৱ সাংবাদিক অভিজিৎ হাজৰিকাৰ লগতে ৰংটি অঞ্চলৰ ৰাইজ উপস্থিত থাকে ৷