সুধাকণ্ঠলৈ অনুপম শ্ৰদ্ধাৰ্ঘ্য: নগাঁৱৰ শিল্পী ৰঞ্জন বেজবৰুৱাৰ কণ্ঠত সংস্কৃত শ্ৰৱ্য চিডি 'আনন্দিনী' উন্মোচন

নগাঁৱৰ  পৰা  ঋতু  পৰ্ণ  শৰ্মা:

মঙলবাৰে অসমৰ বিভিন্ন প্ৰান্তৰ লগতে ভাৰত, বাংলাদেশ আৰু বিশ্বৰ ভিন্ন ঠাইত বিস্তৃত কাৰ্যসূচীৰে ভাৰতৰত্ন তথা সুধাকন্ঠ ডঃ ভূপেন হাজৰিকাৰ অষ্টম স্মৃতি দিৱস পালন কৰা  হৈছে। এই উপলক্ষে ব্যতিক্ৰমীৰূপত শ্ৰদ্ধাঞ্জলি জনাইছে  সংস্কৃত ভাষাত চিৰসেউজ ভাৰতীয় গীত গাই প্ৰসিদ্ধি লাভ কৰা নগাঁৱৰ  শিল্পী ৰঞ্জন বেজবৰুৱাই- নতুন শ্ৰব্য চিডি 'আনন্দিনী'ৰ চানেকিৰূপ  উন্মোচনেৰে।ডঃভূপেন হাজৰিকাই যি বিশ্ব-সংগীতৰ পোষকতা কৰিছিল, সেই বাটতে এখোজ দিয়াৰ প্ৰয়াস কৰি ৰঞ্জন বেজবৰুৱাই আন্তৰ্জাতিক ধ্ৰুপদী ভাষা সংস্কৃতত নিৱেদন কৰিছে- দেশপ্ৰেম আৰু আধ্যাত্মিকভাৱৰ বাৰটি নিৰ্বাচিত সংস্কৃত গীতেৰে 'আনন্দিনী'। ইয়াৰ উল্লেখযোগ্য গীতসমূহ হ'ল- সংস্কৃত অনুবাদত পঞ্চদশ শতিকাৰ শ্ৰীমন্ত শংকৰদেৱৰ বৰগীত 'জয় জয় যাদৱ' আৰু গুজৰাটী ভজন বৈষ্ণৱ জন তো; মীৰা বাঈৰ  ভজন 'পায়ো জী মেইনে';  প্ৰতিমা পাণ্ডেৰ কণ্ঠৰ অসমীয়া লোকগীত 'একবাৰ হৰি বল মন'; মহম্মদ ইকবালৰ 'চাৰে জাহাঁ চে অচ্ছা'; ভূপেন হাজৰিকাৰ 'মহাবাহু ব্ৰহ্মপুত্ৰ', 'কত জোৱানৰ মৃত্যু হ'ল; এ আৰ ৰহমানৰ 'ভাৰত হমকো জান চে প্যাৰা হ্যে', 'দিল হ্যে চোটা চা' তথা অসম আৰু বাংলাদেশৰ জাতীয় সংগীত ক্ৰমে- লক্ষ্মীনাথ বেজবৰুৱাৰ 'অ' মোৰ আপোনাৰ দেশ' আৰু ৰবীন্দ্ৰনাথ বিৰচিত- 'আমাৰ সোণাৰ বাংলা' তথা শিল্পী বেজবৰুৱাৰ স্বৰচিত ' জবা-কুসুমসংকাশম্ । ইতিমধ্যে শিল্পী বেজবৰুৱাই  সহশিল্পী প্ৰণতি বৰুৱা, কৃষ্ণা দাস বৰা, ঋতুৰাণী মৌচুমী আৰু কানুৰ কণ্ঠত সংগীত পৰিচালকদ্বয় প্ৰাঞ্জল বৰা আৰু অভিষেক ধৰৰ তত্ত্বাৱধানত এই বাৰটি ভিন্নসুৰী গীতেৰে 'আনন্দিনী'ৰ এটি চানেকিৰূপ (প্ৰ'ম') শিল্পীৰ গৃহ চহৰৰ নগাঁও প্ৰেছ ক্লাৱত কবি ডঃ প্ৰয়াগ শইকীয়াৰ হাতেৰে মুক্তি দিয়াা হৈছে আৰু যি বিভিন্ন  ছ'চিয়েল মিডিয়াত উপলব্ধ হৈছে। শ্ৰোতা ৰাইজে চূড়ান্তৰূপত শুনিব পাৰিব হ'ব আগন্তুক নৱবৰ্ষৰ প্ৰাক্ ক্ষণত। বেনাৰচ বিশ্ববিদ্যালয়ৰ অধ্যাপিকা সিদ্ধিদাত্ৰী ভৰদ্বাজ আৰু উদীয়মান সংস্কৃতজ্ঞ গীতিকাৰ  আলোক কুমাৰ, জৱাহৰলাল নেহৰু বিশ্ববিদ্যালয়ৰ অধ্যাপক নাৰায়ণ দত্ত মিশ্ৰ তথা শিল্পী বেজবৰুৱাৰ  নিজা অনুবাদ আৰু মৌলিক ৰচনাৰে সমৃদ্ধ এই শ্ৰৱ্য এলবামৰ কেইবাটাও গীত ইতিমধ্যে ৰাষ্ট্ৰীয় প্ৰচাৰ মাধ্যমত বিভিন্ন সময়ত সম্প্ৰচাৰিত হৈ গৈছে। তাৰ ভিতৰত আকাশবাণী গুৱাহাটী আৰু ৰাঁচী, ডিডি নিউজ, জি-নিউজ আদিয়েই প্ৰধান। শিল্পী ৰঞ্জন বেজবৰুৱাই বিগত ডেৰশ বছৰীয়া জন্মদিনত গান্ধীজীক শ্ৰদ্ধা জনাবৰ বাবে যিদৰে বাপুৰ প্ৰিয় ভজন অথৱা 'অ' মোৰ আপোনাৰ দেশ' সংস্কৃতত গাইছে, তেনেকৈয়ে সংস্কৃত তৰ্জমা কৰি গাইছে ভাৰতৰ প্ৰতিবেশী ৰাষ্ট্ৰ বাংলাদেশৰ জাতীয় সংগীতটিও। স্বৰূপতেই ই এক সাংস্কৃতিক বিনিময়ৰ প্ৰয়াস আৰু ইয়াৰ দ্বাৰা ভিন্ন দেশৰ স্বাভিমান আৰু সাংস্কৃতিক অস্মিতাক উদাৰ হৃদয়েৰে আদৰ কৰি নিজৰ দেশৰ বাবেও সৌজন্য আৰু সহযোগ আদায়ৰ পথ সুগম কৰিব পৰা যাব বুলি শিল্পী বেজবৰুৱাই অন্তৰেৰে বিশ্বাস কৰিছে। বাস্তৱিকতেই ভাৰতবৰ্ষৰ শান্তি, ভ্ৰাতৃত্ববোধ আৰু সমৃদ্ধি ৰচনাৰ বাবে এনেধৰণৰ প্ৰয়াস কাৰ্যকৰী হৈ উঠিব পাৰে । বিশ্বশিল্পী ডঃ ভূপেন  হাজৰিকাও এনে উদাৰ সংস্কৃতিৰে অগ্ৰদূত আছিল বুলি বেজবৰুৱাই কয় আৰু তাকে নতুনৰূপে ডাঙি ধৰিবলৈকে আজি সুপ্ৰাচীন মহৎ ভাষা সংস্কৃতৰ সহায় লোৱা হৈছে বুলি শিল্পীজনে উল্লেখ কৰে। উল্লেখ্য যে দীৰ্ঘ দিন ধৰি  ৰঞ্জন বেজবৰুৱাই  ভাৰতীয় সুগম সংগীতক সংস্কৃতৰ মাধ্যমেৰে আৰু সংস্কৃত ভাষাক ভাৰতীয় সংগীতৰ মাধ্যমেৰে নৱৰূপত জনপ্ৰিয় কৰিবলৈ অহৰহ প্ৰচেষ্টা কৰি আহিছে, যাৰ দ্বাৰা দেশীয় ভাষা আৰু  কৃষ্টি উভয়েই সমৃদ্ধ হৈছে।ৰাষ্ট্ৰীয় চেনেল 'ডি ডি নিউজ' যোগে প্ৰচাৰিত ৰঞ্জন বেজবৰুৱাৰ কণ্ঠৰ দেশপ্ৰেমমূলক গীত ইকবালৰ 'চাৰে জাঁহা চে অচ্ছা', কবি ৰবীন্দ্ৰনাথৰ 'একলা চলো ৰে', এ আৰ ৰহমানৰ 'ভাৰত হমকো', ডঃ ভূপেন হাজৰিকাৰ 'গংগা' আৰু গুজৰাটী ভজন 'বৈষ্ণৱ জন তো'ৰ  সংস্কৃত ৰূপান্তৰ আজি দেশৰ অন্যতম জনপ্ৰিয় সংস্কৃত গীত।