প্ৰদীপ দত্ত ৰায়ক বিজেপিৰ প্ৰাথমিক সদস্য পদৰ পৰা বৰ্খাস্ত

কথাত কটা গ'ল বিজেপি নেতা প্ৰদীপ দত্ত ৰায়৷ শিলচৰৰ এইগৰাকী বিতৰ্কিত বিজেপি নেতাক আজি দলৰ প্ৰাথমিক সদস্যৰ পৰা বৰ্খাস্ত কৰে ৰাজ্যিক বিজেপিয়ে৷ উল্লেখ্য যে নাগৰিকত্ব সংশোধনী বিধেয়কৰ বিৰোধিতাৰে শিলচৰৰ অসম বিশ্ববিদ্যালয়ৰ অসমীয়া ছাত্ৰসকলে প্ৰতিবাদ কৰাক লৈ শিলচৰৰ বিজেপি নেতা প্ৰদীপ দত্ত ৰায়ে কৰা বিতৰ্কিত মন্তব্যত সমগ্ৰ ৰাজ্যজুৰি সৃষ্টি হৈছিল প্ৰতিক্ৰিয়া৷ বিজেপি দলৰ ভিতৰে-বাহিৰেও এই সম্পৰ্কত তীব্ৰ জোকাৰণিৰ সৃষ্টি হয়৷

তাৰ ফলশ্ৰুতিতে বিজেপিৰ ৰাজ্যিক নেতৃত্বই প্ৰদীপ দত্ত ৰায়ক দলৰ পৰা বহিষ্কাৰ কৰিবলগা হয়৷ আজি ৰাজ্যিক বিজেপিৰ সভাপতি ৰণজিৎ কুমাৰ দাসে প্ৰদীপ দত্ত ৰায়ক দলৰ প্ৰাথমিক সদস্য পদৰ পৰা বৰ্খাস্ত কৰে৷ ৰাজ্যিক বিজেপিৰ সাধাৰণ সম্পাদক দিলীপ শইকীয়া স্বাক্ষৰিত বৰ্খাস্তকৰণ পত্ৰত এই কথা প্ৰকাশ৷ দলৰ নীতি আৰু স্থিতিৰ বিৰুদ্ধে অৱস্থান গ্ৰহণ কৰা আৰু দলীয় অনুশাসন ভংগ কৰাৰ অভিযোগত তেওঁক ৰাজ্যিক বিজেপিৰ সভাপতি ৰণজিৎ কুমাৰ দাসে তৎকালে বলৱৎ হোৱাকৈ বৰ্খাস্ত কৰা বুলি ইয়াত প্ৰকাশ৷