সংঘৰ্ষত আফগানী সেনাৰ হাতত ৭৪টা তালিবানী সন্ত্ৰাসবাদী নিহত

আফগানিস্থানৰ প্ৰতিৰক্ষা মন্ত্ৰীয়ে এটা বিবৃতিত দেওবাৰে কয় যে তেওঁলোকৰ সেনাৰ হাতত ৭৪টা তালিবানী সন্ত্ৰাসবাদীৰ মৃত্যু ঘটিছে। কান্দাহাৰত সশস্ত্ৰ বাহিনীৰে হোৱা সংঘৰ্ষত সন্ত্ৰাসবাদী কেইটা নিহত হোৱা বুলি জানিবলৈ দিয়ে ৷ প্ৰতিৰক্ষা মন্ত্ৰণালয়ৰপৰা দিয়া এটা টুইটত এইবুলি উল্লেখ কৰি কয় যে Zheria, Dand, Panjwae আৰু Arghandab জিলাত হোৱা সংঘৰ্ষত ৭৪টা সন্ত্ৰাসবাদী নিহত হয় আৰু আন ১৫টা আহত হৈছে৷ আফগান সুৰক্ষা বাহিনীৰ ওপৰত কৰা আক্ৰমণৰ প্ৰত্যুত্তৰত কৰা আক্ৰমণৰ ফলত সন্ত্ৰাসবাদীকেইটাৰ মৃত্যু হোৱা বুলি চৰকাৰী সূত্ৰই জনাইছে ৷ ঘটনাস্থলীৰপৰা বুজন পৰিমানৰ অস্ত্ৰ-শস্ত্ৰৰ লগতে ৭৪টা মৃতদেহ উদ্ধাৰ হয় ৷ আফগান চৰকাৰ আৰু তালিবানৰ মাজত সঘনাই হোৱা শান্তি আলোচনায়ো একো সুফল দিব নোৱাৰাৰ পাছত যোৱা কিছুদিনৰপৰা কান্দাহাৰ আৰু সীমান্তবৰ্তী এলেকাত সঘনাই সংঘৰ্ষৰ সৃষ্টি হোৱাৰ বাতৰিয়ে আন্তঃৰাষ্ট্ৰীয় শিৰোনামা দখল কৰিছে ৷