জালালপুৰত সুস্মিতা দেৱৰ প্ৰচাৰ চলোৱা গাড়ী জব্দ

শিলচৰৰ পৰা বিক্ৰম দাস

শিলচৰৰ কংগ্রেছ প্রার্থী সুস্মিতা দেৱৰ এখন নিৰ্বাচন প্রচাৰ চলোৱা গাড়ী জব্দ কৰে নির্বাচন আয়োগে। বগা ৰঙৰ টাটা চুম'খনত সুস্মিতা দেৱৰ এখন  ডাঙৰ ফ্ল্যাক্স লগোৱা আছিল। গাড়ীখনত মাইক লগাই জালালপুৰ অঞ্চলত কংগ্রেছৰ প্রচাৰ চলোৱা হৈছিল। 

আজি দুপৰীয়া ২.৩০ বজাত নিৰ্বাচনী আচৰণ বিধিৰ পৰ্যবেক্ষক দলে  অতৰ্কিতে অভিযান চলাই গাড়ীখন আটক কৰে। লক্ষণীয় যে আটক কৰা চুম'
গাড়ীখন অন্য এখন গাড়ীৰ অনুজ্ঞাপত্ৰ ব্যৱহাৰ কৰিহে চলোৱা হৈছিল। সেইবাবে এমচিচিৰ সদস্য‌ই গাড়ীখন জব্দ কৰি কাটিগড়া থানালৈ  লৈ যায়।