শিৱসাগৰত জব্দ ত্ৰিশ লক্ষাধিক টকা

শিৱসাগৰৰ পৰা কল্যাণজ্যোতি বুঢ়াগোহাঁই

সমাগত লোকসভা নিৰ্বাচন স্বচ্ছ আৰু নিকা ভাৱে অনুষ্ঠিত কৰিবলৈ  কঠোৰ স্থিতি গ্ৰহণ কৰিছে নিৰ্বাচন আয়োগে। বিগত কেইদিন মানতেই অসম তথা উত্তৰ পূৰ্বাঞ্চলৰ বিভিন্ন স্থানত ফ্লাইং স্কোৱাৰ্ডৰ দলে কেইবা কোটি টকা জব্দ কৰিবলৈ সক্ষম হৈছে। 

শিৱসাগৰত আজি ফ্লাইং স্কোৱাৰ্ডৰ দলে জব্দ কৰে ত্ৰিশ লক্ষাধিক টকা। নগৰৰ সমীপৰ লক্ষ্মীনগৰত তালাচী চকীত ফ্লাইং স্কোৱাৰ্ডৰ দলে এই বৃহৎ পৰিমাণৰ টকাখিনি জব্দ কৰিবলৈ সক্ষম হৈছে। দুজন লোকে এখন বলেৰো ' গাড়ীত কঢ়িয়াই আনিছিল উক্ত টকা খিনি। অৰুণ পাঠক আৰু টংকেশ্বৰ বৰগোহাঁই নামৰ লোক দুজনে কঢ়িয়াই অনা টকাখিনি শিৱসাগৰ সদৰ ষ্টেট বেংকৰ পৰা লাকুৱা চাহ বাগানলৈ নিয়া হৈছিল বুলি তেওঁলোকে জানিবলৈ দিয়ে। জব্দ কৰা টকাখিনি শিৱসাগৰ সদৰ আৰক্ষী থানালৈ লৈ যোৱা হয় আৰু আয়কৰ বিভাগক যাৱতীয় ব্যৱস্থা গ্ৰহণ কৰিবলৈ চমজাই দিয়ে।