মাজদিয়াত 'আইদেউ চ'ৰা' ভোটাৰ সজাগতা সমদল

চেঙাৰ পৰা সুৰজিৎ পাঠক

বৰপেটা জিলাৰ মাজদিয়াত  ভোটাৰৰ মাজত সজাগতা সৃষ্টি কৰিবলৈ মঙলবাৰে  'আইদেউ চ'ৰা' শীৰ্ষক এক বিশাল সমদল উলিওৱা হয় । মাজদিয়া  হাইস্কুল খেলপথাৰৰ পৰা উলিওৱা ভোটাৰ সজাগতা সমদলটোত সহযোগিতা আগবঢ়ায় ১৫নং দক্ষিণ পূব সৰুক্ষেত্ৰী গাঁও পঞ্চায়তৰ ১০নং ৱাৰ্ডৰ সদস্যা  আৰবিন চুলতানাই ।  অসম ৰাজ্যিক গ্ৰামীণ জীৱিকা অভিযান আঁচনিৰ অধীনত সৰুক্ষেত্ৰী উন্নয়ন খণ্ডৰ উদ্যোগত এই সমদল উলিওৱা হয়। সৰুক্ষেত্ৰী উন্নয়ন খণ্ডৰ অধীনস্থ 'জীৱিকা সখী' মঞ্জুমা খাতুন আৰু মামনি খাতুনৰ  নেতৃত্বত উলিওৱা ভোটাৰ সজাগতা সমদলত প্ৰায় তিনিশ মহিলাই অংশগ্ৰহণ কৰি বিভিন্ন শ্লোগানেৰে ভোটাৰসকলৰ মাজত সজাগতা সৃষ্টিৰ চেষ্টা কৰে।খণ্ড সমন্বয়ক বিশ্বজিৎ দাসৰ তৎপৰতাত এই কাৰ্যসূচী সফলতাৰে ৰূপায়ণ কৰা হয়। সমদলটোৰ জৰিয়তে  বৃদ্ধাৱস্থাৰ লোক,গৰ্ভৱতী মহিলা,শাৰীৰিকভাৱে বিশেষভাৱে সক্ষম লোকসকলক সহায় কৰিবলৈ আহ্বান জনায় 'চন্দ্ৰপ্ৰভা বাইদেউ' জীৱিকা সখী মঞ্জুমা খাতুনে।