বিশ্ব প্ৰতিবন্ধী দিৱস বৰ্জন : দীঘলীপুখুৰীপাৰত প্ৰতিবন্ধীসকলৰ প্ৰতাৰণা দিৱস

আজি বিশ্ব প্ৰতিবন্ধী দিৱস ৷

কিন্তু প্ৰতিবন্ধী দিৱসৰ কাৰ্যসূচী বৰ্জন কৰি ৰাজ্যৰ প্ৰতিবন্ধীসকলে এই দিৱসটো পালন কৰিছে প্ৰতাৰণা দিৱস হিচাপে ৷

সেই উদ্দেশ্যে মহানগৰীৰ দীঘলীপুখুৰীপাৰত সমবেত হৈ মৌন প্ৰতিবাদ সাব্যস্ত কৰিছে ৰাজ্যৰ কেইবাটাও প্ৰতিবন্ধী সংগঠনে ৷

অসম চৰকাৰ আৰু সমাজ কল্যাণ বিভাগৰ বঞ্চনাৰ বিৰুদ্ধে প্ৰতাৰণা দিৱসৰ কাৰ্যসূচী গ্ৰহণ কৰি উলিয়াইছে মৌন সমদল ৷

পুৱা ১১.৩০ বজাৰ পৰা মুখত ক'লা কাপোৰ বান্ধি প্ৰতিবন্ধী সুৰক্ষা সমিতিৰ লগতে ৰাজ্যৰ বিভিন্ন প্ৰান্তৰ পৰা অহা আন আন প্ৰতিবন্ধী সন্থাৰ প্ৰতিনিধিসকলে চৰকাৰৰ বিৰুদ্ধে প্ৰতিবাদত নমা দেখিবলৈ পোৱা গৈছে ৷

হাতে হাতে বিভিন্ন দাবীসম্বলিত আৰু চৰকাৰবিৰোধী শ্লোগান লিখা প্লে'-কাৰ্ড লৈ চৰকাৰৰ বিৰুদ্ধে ক্ষোভ উজাৰিছে ৰাজ্যৰ প্ৰতিবন্ধীসকলে ।

লগতে অহিংস আন্দোলত নমা প্ৰতিবন্ধীসকলৰ ওপৰত আৰক্ষীয়ে চলোৱা নিৰ্মম অত্যাচাৰক নিন্দা কৰি মুখ্য মন্ত্ৰী সৰ্বানন্দ সোণোৱালক ধিক্কাৰ দিয়ে ৷

আনহাতে, প্ৰতিবন্ধী প্ৰতিবাদকাৰীৰ ওপৰত নিৰ্মম অত্যাচাৰ চলোৱা আৰক্ষী বিষয়া অমিতাভ বসুমতাৰীক দৃষ্টান্তমূলক শাস্তি বিহাৰো দাবী জনায় প্ৰতিবাদকাৰীসকলে ৷

প্ৰতিবাদত অংশগ্ৰহণ কৰিছে প্ৰতিবন্ধী সুৰক্ষা সংস্থা, অসম, দৃষ্টিহীন পৰিষদ, অসম, সদৌ অসম দৃষ্টিহীন ছাত্ৰ সন্থা, পূবালী প্ৰতিবন্ধী সন্থা, সদৌ বিটিএডি প্ৰতিবন্ধী সুৰক্ষা সংস্থা, কলিয়াবৰ প্ৰতিবন্ধী সংস্থাকে ধৰি কেইবাটাও সংস্থাই ৷