বেঁকী নৈৰ খহনীয়া প্ৰতিৰোধৰ বাবে ৮.১০ কোটিৰ অনুমোদন

'বৰপেটাৰোডৰ নিকটৱর্তী ছাফাকামাৰত হোৱা বেঁকী নদীৰ খহনীয়া প্ৰতিৰোধৰ কাম অহা ডেৰ মাহৰ ভিতৰতে কৰা হ'ব । ইয়াৰ বাবে ইতিমধ্যে ৮ কোটি ১০ লাখ টকাৰ এটি অনুমোদন লাভ কৰা হৈছে ।'

বিজেপিৰ ৰাজ্যিক সভাপতি তথা সৰভোগ সমষ্টিৰ বিধায়ক ৰঞ্জিত কুমাৰ দাসে সোমবাৰে গোৱর্ধনাত স্থানীয় কেইবাটাও দল-সংগঠনৰ লগতে ৰাইজৰ উপস্থিতিত এই আশ্বাস প্রদান কৰে ।

উল্লেখ্য, বৰপেটাৰোডৰ কাষৰীয়া ছাফাকামাৰ অঞ্চলত বিগত কেইবাবছৰো ধৰি হৈ থকা গৰাখহনীয়াৰ ফলত সেই অঞ্চলৰ কেইবাশ লোকে ভেটি-মাটিসহ উছন হোৱাৰ উপৰি বিগত বৰ্ষৰ পৰাই সেই অঞ্চলক স্পর্শ কৰা তথা মানাহ ৰাষ্ট্ৰীয় উদ্যান সংযোগী বৰপেটাৰোড-বাঁহবাৰী গড়কাপ্তানি পথটো খহনীয়াৰ কবলত পৰি এইবেলি নিঃশেষ হৈছে ।

ফলত সেই অঞ্চলেৰে যাতায়াত পর্যন্ত বন্ধ হৈ পৰাৰ লগতে প্রায় ডেৰ কিলোমিটাৰ গড়কাপ্তানি পথটো যিদৰে অস্তিত্বৰ সংকটত ভুগিছে, তেনেদৰে বৰপেটা আৰু উত্তৰপৰীয়া ৰাইজৰ বাবে যমৰ যাতনা হৈছে ।

ইতিমধ্যে এই অঞ্চলটোৰ খহনীয়া প্ৰতিৰোধৰ বাবে ৰাইজৰ লগতে কেইবাটাও দল-সংগঠনে প্রতিবাদী কাৰ্যসূচী লৈছে আৰু খহনীয়া প্ৰতিৰোধৰ ব্যৱস্থা নকৰিলে আন্দোলনৰো হুংকাৰ দিয়ে ।

এনে পৰিস্থিতিৰ মাজতে সোমবাৰে সন্ধিয়া গোৱর্ধনাৰ প্রগতি সংঘ প্ৰাংগণত গোৱর্ধনা মণ্ডল বিজেপিৰ উদ্যোগত আয়োজিত এখন ৰাজহুৱা সভাত সৰভোগ সমষ্টিৰ বিধায়ক ৰঞ্জিত কুমাৰ দাসে নতুন আঁচনিৰ কথা সদৰী কৰে ৷

উল্লেখ্য যে বৃহত্তৰ গোৱর্ধনা অঞ্চলৰ খহনীয়া প্রতিৰোধৰ বাবে ইতিমধ্যে দুটাকৈ আঁচনি কার্যকৰী কৰাৰ বাবে উদ্যোগ লোৱাৰ পিছত শেহতীয়াকৈ ছাফাকামাৰৰ সমস্যাৰ বাবে জলসম্পদ বিভাগৰ এছ অ’ পি আঁচনিত ৮ কোটি ১০ লাখৰ এটি আঁচনিৰ প্রাথমিক অনুমোদন লাভ কৰাৰ লগতে অন্য এটা শিতানত ৪৭ কোটিৰ আঁচনি গ্ৰহণ কৰা বুলি সোমবাৰৰ সভাতে মন্ত্ৰী দাসে কয় ।

উল্লেখ্য, এই আঁচনিৰ অধীনত ছাফাকামাৰ অঞ্চলত গৰাখহনীয়া প্ৰতিৰোধৰ বাৰে জিঅ' বেগৰ লগতে কিছু ঢালাই কামো সম্পন্ন কৰা হ'ব আৰু এই আঁচনিখন নিবিদাৰ পিছতে পূজাৰ পূর্বে কাম আৰম্ভ হ'ব ।

অৱশ্যে ৪৭ কোটিৰ আঁচনিখন বর্তমানলৈ অনুমোদন হোৱা নাই যদিও সেই আঁচনিখনো ড’নাৰ মন্ত্রালয়ে অচিৰেই অনুমোদন জনাব বুলি ৰাজ্যিক বিজেপিৰ সভাপতিগৰাকীয়ে সদৰী কৰে ।