বইটামাৰীত জৰাজীৰ্ণ বাঁহৰ সাঁকোৰে যাতায়াত দুখন গাঁৱৰ বাসিন্দাৰ

বঙাইগাঁও বিধানসভা সমষ্টিৰ অন্তৰ্গত নৰ্থ বইটামাৰীৰ দেৱানগাঁও আৰু ধলাগাঁৱত টুনীয়া নৈৰ ওপৰত আছে দুখন জৰাজীৰ্ণ বাঁহৰ সাঁকো । টুনীয়া নৈৰ সিপাৰে থকা ধলাগাঁও-টিলাপাৰা আৰু দেৱানগাঁও-ৰাভাপাৰাৰ বাসিন্দাসকলে প্ৰতিদিনে এই জৰাজীৰ্ণ সাঁকো দুখন পাৰ হৈ যাতায়াত কৰি আহিছে ।

জৰাজীৰ্ণ সাঁকো পাৰ হওঁতে ইতিমধ্যে বহু লোকৰ মৃত্যুও ঘটিছে । বাৰিষা প্ৰায়েই জটিল পৰিস্থিতিৰ সম্মুখীন হয় গাঁও দুখনৰ লোকসকল । প্ৰায়েই বাৰিষা টুনীয়াৰ কোবাল সোঁতে সাঁকো দুখন উটুৱাই নিয়ে ।

সেই সময়ত আলৈ-আথানি নোহোৱা হয় লোকসকলৰ । প্ৰসূতিকে ধৰি আন বিভিন্ন বেমাৰী নৈ পাৰ হৈ ইপাৰলৈ চিকিৎসাৰ বাবে আহিব নোৱাৰাৰ বাবে যন্ত্ৰণাত চটফটাই থাকিবলগা হয় । বহু পৰিয়ালে ৩-৪ দিন পৰ্যন্ত লঘোণে-অনাহাৰে থাকে ।

নৈ পাৰ হৈ শিক্ষক যাব নোৱাৰাৰ বাবে দেৱানগাঁও-ৰাভাপাৰা প্ৰাথমিক বিদ্যালয়ত সেইসময়ত পাঠদান ব্যাহত হয় । বছৰ বছৰ ধৰি স্থানীয় ৰাইজে উক্ত দুঠাইত পকী দলঙৰ বাবে দাবী জনাই আহিছে যদিও স্থানীয় জনপ্ৰতিনিধি তথা বিভাগীয় কৰ্ত্তৃপক্ষই কোনো ব্যৱস্থা গ্ৰহণ কৰা নাই ।

উল্লেখ্য যে ৩০ বছৰৰো অধিককাল সমষ্টিটোত একেৰাহে বিধায়ক হিচাপে নিৰ্বাচিত হৈ আহিছে বৰ্তমানৰ মন্ত্ৰী ফণীভূষণ চৌধুৰী ।