প্ৰাৰ্থী তালিকাক লৈ দোমোজাত ৰাজ্যিক বিজেপি : তেজপুৰ-নগাঁৱত এতিয়াও চূড়ান্ত হোৱা নাই প্ৰাৰ্থী

প্ৰতিমুহূৰ্ততে সলনি হৈছে লোকসভা নিৰ্বাচনৰ ৰাজ্যিক বিজেপিৰ চূড়ান্ত প্ৰাৰ্থী তালিকা। ৰাজ্যিক বিজেপিয়ে প্ৰস্তুত কৰা প্ৰাৰ্থীৰ তালিকাক লৈ সুখী নহয় বিজেপিৰ কেন্দ্ৰীয় নেতৃত্ব। ঘোষণা কৰিবলৈ লৈও বাৰে বাৰে থমকি ৰৈছে ৰাজ্যিক বিজেপিৰ নেতৃত্ব। 
প্ৰথম অৱস্থাত তেজপুৰ লোকসভা সমষ্টিৰ পৰা আৰ পি শৰ্মাৰ পৰিৱৰ্তে উক্ত সমষ্টিত ৰাম মাধৱৰ অনুৰোধত ৰাজ্যিক বিজেপিয়ে অন্তৰ্ভুক্ত কৰিছিল মন্ত্ৰী হিমন্ত বিশ্ব শৰ্মাক। সেই কথা স্পষ্ট হোৱাৰ পাছতে তেজপুৰৰ বৰ্তমানৰ সাংসদগৰাকীয়ে বিজেপি দলৰ পৰা পদত্যাগ কৰে৷

সাংসদগৰাকীৰ পদত্যাগ-পত্ৰ কেন্দ্ৰীয় নেতৃত্বই পোৱাৰ পাছতে ৰাজ্যিক বিজেপিৰ নেতৃত্বৰে বৈঠকত বহিছিল বিজেপিৰ কেন্দ্ৰীয় নেতৃত্ব। উক্ত বৈঠকতে কেন্দ্ৰীয় নেতৃত্বই ৰাজ্যিক বিজেপিক জবাবদিহি কৰিছিল তেজপুৰ লোকসভা সমষ্টিত আৰ পি শৰ্মাৰ নাম কৰ্তন সন্দৰ্ভত। লগতে কেন্দ্ৰীয় নেতৃত্বই বিজেপিৰ ৰাজ্যিক নেতৃত্বক আহ্বান জনাইছিল লোকসভা নিৰ্বাচনত নেডাৰ আহ্বায়ক হিমন্ত বিশ্ব শৰ্মাই যাতে প্ৰতিদ্বন্দ্বিতা নকৰে।

কাৰণ কেন্দ্ৰীয় নেতৃত্বই মন্ত্ৰী হিমন্ত বিশ্ব শৰ্মাক সমগ্ৰ উত্তৰ-পূৰ্বাঞ্চলৰ নিৰ্বাচনীৰ প্ৰচাৰক হিচাপে নিযুক্তি দিয়াত গুৰুত্ব দিছিল। তাৰ ফলতে ৰাজ্যিক বিজেপিয়ে পূৰ্বতে তেজপুৰ লোকসভা সমষ্টিৰ প্ৰাৰ্থী হিচাপে অন্তৰ্ভুক্ত কৰা হিমন্ত বিশ্ব শৰ্মাৰ নাম শেহতীয়াভাৱে প্ৰাৰ্থী তালিকাৰ পৰা কৰ্তন কৰিছে। এই কথা জানিবলৈ দিছে ৰাজ্যিক বিজেপিৰ সভাপতি ৰঞ্জিত দাসে। তেওঁ লগতে কয় যে মন্ত্ৰী হিমন্ত বিশ্ব শৰ্মাই লোকসভা নিৰ্বাচনত প্ৰতিদ্বন্দ্বিতা নকৰে।

তাৰ পৰিৱৰ্তে দলৰ প্ৰচাৰৰ কামত জড়িত হ'ব। ইয়াৰ উপৰি ৰাজ্যিক বিজেপিৰ সভাপতিগৰাকীয়ে চূড়ান্ত প্ৰাৰ্থী তালিকা ঘোষণা কৰাৰ সন্দৰ্ভত কয় যে অসমৰ মুঠ ১৪খন লোকসভা আসনৰ ১০খনত বিজেপিয়ে প্ৰাৰ্থী থিয় কৰাব। ইয়াৰে তেজপুৰ আৰু নগাঁও লোকসভা সমষ্টিৰ বাহিৰে অন্য সমষ্টিৰ প্ৰাৰ্থী তালিকা প্ৰায় চূড়ান্ত। কেন্দ্ৰীয় নেতা অমিত শ্বাহে চহী কৰিলেই ঘোষণা কৰিব ৰাজ্যিক বিজেপিয়ে প্ৰাৰ্থী তালিকা।