বিশিষ্ট সাহিত্যিক, ভাষাবিদ, বি বৰুৱা কলেজৰ প্ৰাক্তন অধ্যক্ষ ডঃ প্ৰমোদ চন্দ্ৰ ভট্টাচাৰ্যৰ দেহাৱসান । ৯৩ বছৰ বয়সত বিশিষ্ট ব্যক্তিগৰাকীৰ দেহাৱসান ঘটে গুৱাহাটী নেমকেয়াৰ হাস্পতালত ।
পুৱা ৪.৪০ বজাত দেহাৱসান ঘটা বিশিষ্ট ব্যক্তিগৰাকী আজি কিছুদিনৰ পৰা শ্বাস-প্ৰশ্বাস আৰু বাৰ্ধক্যজনিত ৰোগত আক্রান্ত হৈ আছিল আৰু অৱশেষত সেই ৰোগৰ ওচৰত হাৰ মানি আজি মৃত্যু হয় বিশিষ্ট পণ্ডিতগৰাকী ।
১৯২৫ চনত নলবাৰীত জন্মগ্ৰহণ কৰা বিশিষ্ট পণ্ডিতগৰাকীৰ মৃত্যুৰ খবৰ পোৱাৰ পাছতেই এতিয়া আপোন মানুহজনক শেষবাৰৰ বাবে চাবলৈ আৰু শ্ৰদ্ধাঞ্জলি জনাবলৈ ভালেসংখ্যক গুণমুগ্ধই তেওঁৰ ঘৰত গৈ উপস্থিত হৈছেগৈ ।
বিভিন্ন দল-সংগঠনৰ নেতাৰ পৰা আৰম্ভ কৰি সাংসদ বিজয়া চক্ৰৱৰ্তী, মুখ্য মন্ত্ৰীৰ প্ৰেছ উপদেষ্টা ঋষিকেশ গোস্বামী পুৱাই উপস্থিত হয়গৈ বিশিষ্ট সাহিত্যিকগৰাকীৰ গৃহত ।
মুখ্য মন্ত্ৰীৰ হৈ অন্তিম শ্ৰদ্ধাঞ্জলি জনাই গোস্বামীয়ে কয় যে মুখ্য মন্ত্ৰীৰ নির্দেশমৰ্মে ৰাজ্যিক মৰ্যাদাৰে তেওঁ অন্তিম সৎকাৰ কৰা হ'ব । বিশিষ্ট ব্যক্তিগৰাকীৰ মৃত্যু অসমীয়া জাতিৰ বাবে এক অপূৰণীয় ক্ষতি বুলিও তেওঁ সংবাদ মাধ্যমৰ আগত উল্লেখ কৰে ।
বিশিষ্ট পণ্ডিতগৰাকীৰ মৃত্যুত অসম সাহিত্য সভা, বড়ো সাহিত্য সভা, প্ৰকাশন পৰিষদ, আছু, এবছু, যুৱ-ছাত্ৰ পৰিষদকে ধৰি বিভিন্ন জাতীয়-জনগোষ্ঠীয় সংগঠনে গভীৰ শোক প্ৰকাশ কৰিছে । ইতিমধ্যে অসম সাহিত্য সভাৰ প্ৰতিনিধিকে ধৰি বিভিন্ন দল-সংগঠনৰ প্ৰতিনিধিয়ে তেওঁৰ বাসগৃহত উপস্থিত হৈ শ্ৰদ্ধাঞ্জলি অৰ্পণ কৰে ।
- Log in to post comments
- 72 views
