দিছপুৰৰ পদূলিৰে বিশাল বাইক ৰেলীৰে এজেপি সভাপতি লুৰীণজ্যোতি গগৈক উষ্ম আদৰণি

অসম জাতীয় পৰিষদৰ সভাপতিৰ দায়িত্ব গ্ৰহণ কৰি প্ৰথমবাৰ গুৱাহাটীত উপস্থিত হোৱা 'আছু'ৰ প্ৰাক্তন সাধাৰণ সম্পাদক লুৰীণজ্যোতি গগৈক বিশাল বাইক ৰেলীৰে উষ্ম আদৰণি।দলীয় সতীৰ্থ-শুভাকাংক্ষীয়ে খানাপাৰাৰ পৰা মাছখোৱা আন্ধাৰুবালিলৈ প্রিয় নেতাগৰাকীক উষ্ম আদৰণি জনায়।

গুৱাহাটীৰ ব্যস্ত ৰাজপথত জিন্দাবাদ ধ্বনি তুলি চৰকাৰৰ বৰঘৰ দিছপুৰৰ পদূলিৰে সতীৰ্থই আদৰণি জনায় নৱ-নিৰ্বাচিত সভাপতিগৰাকীক।পথৰ কাষত ৰৈ বহুজনে লুৰীণক জাতীয় সংগ্রামলৈ যোৱাৰ সাহস দিয়ে। অসম জাতীয় পৰিষদ জিন্দাবাদ, লুৰীণজ্যোতি গগৈ জিন্দাবাদ, আমাৰ ককাই জিন্দাবাদ ধ্বনিত মুখৰিত হ'ল গুৱাহাটীৰ ৰাজপথ। সতীৰ্থ-শুভাকাংক্ষীৰ আদৰত আৱেগিক হ'ল লুৰীণজ্যোতি। সভাপতি লুৰীণক আদৰণি যাত্ৰাত সংগ দিলে জগদীশ ভূঞা, পবিন্দ্র ডেকা, চিত্তৰঞ্জন বসুমতাৰী আদি এজেপিৰ শীৰ্ষ নেতৃত্বই। গুৱাহাটীৰ ব্যস্ত ৰাজপথত বিশাল বাইক ৰেলীয়ে যাতে জনতাক অসুবিধাত পেলাব নোৱাৰে,তাৰ প্ৰতি তীক্ষ্ণ গুৰুত্ব পালন কৰি এজেপি কৰ্মকৰ্তাসকলে ৰেলীৰ মাজেৰে ৰোগী কঢ়িওৱা এম্বুলেন্স সুচাৰুপে চলাচল কৰাত সহযোগ কৰাও দেখা যায়। বিশাল বাইক ৰেলীৰ অসম গণ পৰিষদৰ কাৰ্যালয়ৰ সন্মুখত ৰৈ অগপ মূর্দাবাদ ধ্বনি দিয়াও পৰিলক্ষিত হয়। 

বাইক ৰেলীৰ অন্তত লাচিত ঘাটত থকা বীৰ লাচিতৰ প্ৰতিমূৰ্তিৰ সন্মুখত ৰাজহুৱা সম্বৰ্ধনা জনাই সভাপতি লুৰীণজ্যোতি গগৈক।