'ৰাইজৰ দল'ৰ পতাকা-কাৰ্যালয় মুকলি:মৰাণত অনুষ্ঠিত হ'ব লগা ৰাজ্যিক অভিৱৰ্তনৰ দিন ঘোষণা

দেওবাৰে গুৱাহাটীৰ মঠঘৰীয়াত নৱগঠিত আঞ্চলিক দল 'ৰাইজৰ দল'ৰ স্থায়ী কাৰ্যালয় আৰু দলৰ পতাকা আনুষ্ঠানিকভাৱে উন্মোচন কৰা হয়।কৃষক মুক্তিসহ ৭০ সংগঠনৰ নেতৃত্বত গঠিত হোৱা আঞ্চলিক ৰাজনৈতিক দলটোৰ কাৰ্যালয় আৰু পতাকা আনুষ্ঠানিকভাৱে মুকলি কৰে দলটোৰ উপদেষ্টা বিশিষ্ট চলচ্চিত্ৰ নিৰ্মাতা জাহ্নু বৰুৱাই। হালধীয়া আৰু ৰঙা ৰঙৰ পতাকাখন উন্মোচন কৰি আন্তৰ্জাতিক খ্যাতিসম্পন্ন পৰিচালক বৰুৱাই কয় - "পতাকাখনৰ ৰঙে অসমীয়া জাতীয়তাবাদৰ পৰিপক্ক অৱস্থা এটা প্ৰকাশ কৰিছে।" ৰঙা আৰু হালধীয়া ৰঙৰ পতাকাখনত নীলা ৰঙেৰে দলৰ নাম লিখা হ'ব।

আনহাতে,'ৰাইজৰ দল'ৰ প্ৰথমখন ৰাজ্যিক অভিৱৰ্তন উজনি অসমৰ মৰাণত ৭,৮ আৰু ৯ জানুৱাৰীত তিনিদিনীয়াকৈ অনুষ্ঠিত হ'ব বুলি ঘোষণা কৰে কাৰ্যালয় উদ্বোধনী আৰু পতাকা উন্মোচনী সভাতে।উল্লেখ যে পূৰ্বে ৩, ৪ আৰু ৫ জানুৱাৰীত দিন ঘোষণা কৰা হৈছিল যদিও সেয়া বাতিল কৰা হৈছে।

তাৎপৰ্যপূৰ্ণ যে ৰাজ্যিক অভিৱৰ্তনখনত বহুতো বিশিষ্ট ব্যক্তিয়ে নতুন আঞ্চলিক দলটোত যোগদান কৰাৰ সম্ভাৱনা আছে।